Pinaralisa ti maysa a grupo ti New People’s Army (NPA)-Bukidnon ti dua a backhoe ti Ulticon Builders Incorporated (UBI) idi Oktubre 16 iti Sityo Mahagwa, Barangay Hagpa, Impasug-ong. Ti UBI ket kroni a kumpanya iti konstruksyon dagiti Duterte a mangbukbukod ti dadakkel a pangpubliko a kontrata nga aggatgatad ti ₱1 bilyon aginggana ₱3 bilyon kada tawen.

Karaman ti UBI kadagiti proyekto a manangdadael iti aglawlaw ken dagiti bangbangkag, ken mangpatpatakyas kadagiti mannalon iti daga da. Notoryus ti kumpanya iti nakabab-baba a sweldo, saan a panagbayad ti 13th month pay ken dadduma pay a benepisyo. Saan met a nagited daytoy ti danyos kadagiti nadadael a balay, bangkag ken ramit dagiti residente iti panawen ti konstruksyon daytoy.

Idi 2018 ken 2021, pinalak-amanen ti pannusa ti NPA ti UBI gapu iti panangdadael daytoy iti aglawlaw ken panang-abuso kadagiti mangmangged.

Karaman kadagiti kontrata ti UBI ti konstruksyon ti “farm-to-market-roads” (FMR) iti amianan ken abagatan a Mindanao nga us-usaren ita dagiti dadakkel a burgesya kumprador tapno papartaken ti panagserrek ken operasyon dagiti ganggannaet a minas, ekspansyon ti komersyal a plantasyon ken dagiti planta ti enerhiya kadagiti daga a pang-agrikultural ken nainsigudan a daga.

Katinnulong ti UBI iti anti-umili a kampanya nga kontra-insurhensya ti AFP iti panangitakder kadagitoy nga FMR. Awan panagbain ti panangsuporta ti kumpanya kadagiti “programa a pang-kappia” ti berdugo nga 403rd Brigade ken NTF-Elcac nga agiwarwaras ti buteng iti umili ti Bukidnon. Laksid iti konstruksyon dagiti FMR iti prubinsya, karaman met daytoy iti konstruksyon ti pasilidad iti uneg ti kampo militar ti 8th IB.

Impatakder iti Davao ti UBI idi 1993 ti pamilya Gonzalez ken itatta ket idadauluan ni Carlos Gonzalez. Anak na ti itatta ket mangibagbagi ti partylist a MARINO ken deputy majority leader iti Kongreso a ni Lisandro Gonzalez. Paset met isuna kadagiti agpatpataray ti UBI. Maysa ni Lisandro iti napepennek a tagasuporta kadagiti bill ti rehimen Marcos, karamanen ti Maharlika Investment Fund.