Tallo a Nalabbaga a mannakigubat ti pinapatay kabayatan a tengngel ti militar kadaytoy napalabas a dua lawas. Iti Oriental Mindoro, nakemmeg ken inggagara a pinapatay ti 203rd IBde dagiti Nalabbaga a mannakigubat ti New People’s Army (NPA)-Mindoro a da Jethro Isaac Ferrer (Ka Pascual) ken Peter Rivera (Ka Rochie) iti Barangay Buong Lupa, Gloria idi Nobyembre 13. Pinaruar ida a pimmusay iti maysa nga ar-aramid nga engkwentro kadaydiay met laeng nga aldaw. Kinemmeg met ditoy ni Ka Jasel ken saan pay nga inlung-aw aginggana ita.

Iti Sultan Kudarat, kinemmeg ken inggagara a pinapatay ti 37th IB ti Nalabbaga a mannakigubat a ni Rafael Zambrano (Ka Dodong/Tres) idi Oktubre iti Sityo Surong, Barangay Hinalaan, Kalamansig, Sultan Kudarat. Nakemmeg ni Zambrano iti maysa a balay iti Sityo Bugkog, Barangay Limulan idi Oktubre 8 ken pinalak-am ti tortyur. Pagdanon ti Oktubre 11 ti bigat, nasarakan ti bangkay na manipud iti pinaruar ti militar nga “engkwentro” iti rabii ti Oktubre 10 iti Sityo Kalamagan, Barangay Limulan.

Iti Negros Occidental, pinapatay dagiti pwersa ti 15th IB dagiti mannalon a da Waren Cadarin ken Jovy Moreño ken pinaruar a napapatay iti maysa nga ar-aramid nga engkwentro iti Barangay Yaoyao, Cauayan idi Nobyembre 7. Ni Cadarin ket dinukot dagiti soldado iti bangkag na iti Sityo Indangawan, Barangay Manlucahoc, Sipalay idi Nobyembre 4. In-report isuna a mapukpukaw ti pamilya na iti pulisya ken lokal a radyo.

Panag-aresto. Kinemmeg ken imbalud dagiti soldado ti 94th IB ken lokal a pulis dagiti sibilyan a da Joel Casusa ken Jenny Radles idi Nobyembre 8 iti Sityo Pisok, Barangay Buenavista, Himamaylan City, Negros Occidental. Ni Casusa ket sigud a daulo ti lokal nga asosasyon dagiti mannalon iti Barangay Buenavista, kabayatan a ni Radles ket aktibo a kameng ti grupo. Siguden a biktima ti iligal a panag-aresto ni Casusa idi 2019. Parparuaren ti militar a kameng da ti NPA a nakemmeg kalpasan ti maysa nga engkwentro iti lugar.

Panagdukot. Iti Batangas, agsaruno a dinukot dagiti pwersa ti estado ti organisador ti mangngalap a ni Mariano Jolongbayan idi Nobyembre 17 iti Lian ken ni Karla Mae Monge, organisador ti agtutubo, idi Nobyembre 20 iti ili ti Tuy. Agpampannawagan dagiti kabagian da a natalged nga ilung-aw ken palubusan ti dua.

Panangliplipit. Linipit ken binutbuteng dagiti pwersa ti militar ti pamilya ti aktibista a ni Kristel Asilom, lider-agtutubo ti Anakbayan-Bulacan idi Nobyembre 11. Iti Davao City, linipit met dagiti elemento ti NTF-Elcac ti lider mangmangged a ni Paul John Dizon idi Nobyembre 13. Agpada a napanan dagiti soldado ti balay dagiti kabagian da. Iti kaso ni Dizon, pinangtaan isuna a sampaan kadagiti kaso a kriminal nu saan a makitinnulong.

Panagsukain. Sinerrek ken sinukainan dagiti soldado ti 62nd IB ti balay ti mannalon nga ni Maximo Cañete iti Barangay Amuntay ken Melvin Vilando iti Barangay Santol, agpada iti Binalbagan, Negros Occidental idi Nobyembre 13. Pabpabasulen ida a taga-suporta ti buyot ti umili ken pinangtaan a papatayen.