Nagtaltalinaed a nakalansa iti nababa a tukad ti sweldo iti Pilipinas iti sango ti sinsilyo a nayon-sweldo nga inmandar dagiti regional wage board iti napalabas a lima bulan. Nakurang daytoy tapno makakamat dagiti pamilya a mangmangged iti kasta unay a panagngato dagiti presyo ti gagatangen, aglalo ti makan ken krudo.

Idi Setyembre, nalungsot iti 28% ti pudno a gatad ti sweldo gapu ti implasyon. Iti NCR, ₱504 laengen ti pudno a gatad ti maawawat a minimum a ₱610. Awan pay daytoy iti kaguddua ti ₱1,189 kada aldaw a tukad ti makabiag a sweldo. Iti abereyds, 35.5% laeng iti makabiag a sweldo ti maawawat dagiti mangmangged iti intero a pagilian. Uray bimmaba ti implasyon idi Oktubre, nagtalinaed a mas nababa iti pagpatinggaan ti kinarigat (₱12,040/bulan) ti maawawat da nga abereyds a ₱9,158 kada bulan. Nakaad-adayo daytoy iti makabiag a sweldo a ₱25,816 kada bulan idi Oktubre.

“Nabayag” ken “sinsilyo” ti sungbat kadagiti petisyon para iti nayon-sweldo nga indatag dagiti unyon ken sentro ti panggedan a manipud ₱150 aginggana ₱220. Innem kadagiti rehiyon ti nagingato ti sinsilyo a ₱30 ken tallo iti ₱35. Kangatuanen ti ₱50 nayon-sweldo iti National Capital Region ken sumagmamano nga industriya iti Calabarzon. Sangkapirit la ngaruden, “staggered” wenno in-inut pay ti panangipatungpal kadaytoy iti sumagmamano a rehiyon. Aginggana ita, awan pay nayon a sweldo kadagiti rehiyon ti 10, 11 ken 13, kasta met iti BARMM, nu sadinno ket kadakkelan ti baet ti minimum ken makabiag a sweldo.

Nakarkaro ti inted a nayon-sweldo kadagiti mangmangged-talon a ₱20 aginggana ₱40 nababbaba nu iyarig kadagiti mangmangged iti industriya ken serbisyo. Inawagan dagiti mangmangged-talon a “limos” ti nayon iti aldawan a minimum a kadawyan pay a saan nga ipatpatungpal iti kaaw-awayan. Iti agdama, agsu-sweldo ti kaaduan kadagiti mangmangged iti agrikultura manipud iti ₱16 aginggana ₱240 laeng kada aldaw.

Lalo a saan a makaanay ti nayon-sweldo tapno ingato ti tukad ti sweldo ti babbai. Iti kabuklan, nababbaba ti 13.9% ti maaw-awat dagiti babbai a mangmangged a minimum ti sweldo nu iyarig iti lallaki, segun mismo iti ahensya ti estadistika ti estado. Dakdakkel ti panagsinnupadi kadagiti trabaho a propesyonal, kas iti tay-ak a digital, nu sadinno a nababbaba ti 18.4% ti sweldo ti babbai nu iyarig iti lallaki.