Gunggunggonen itatta ti aggi-giddan a krisis iti ekonomya ken pulitika ti nalungsot nga agari-ari a sistema iti pagilian. Iti sango ti nakaru a panagsagaba ti umili a Pilipino iti tengnga ti krisis, lallalo a rumubrubrob ti determinasyon da a makidangadang para iti kabiagan ken kalikagum da, salakniban dagiti demokratiko a karbengan da ken ilaban ti pagimbagan ti pagilian laban iti ganggannaet a panaggamrud ken panangirurumen.

Nakadasay ti ekonomya ti pagilian a paglatlatakan ti pannaka-ilumlom ti manupaktura ken agrikultura, kinaubbaw ti pagilian ken lalo a pannaka-ilumlom iti utang. Gapu ta nakagalut iti sangalubongan a sistema a kapitalista a makapadpadas itatta ti istagnasyon, ti ekonomya ti Pilipinas ket manamnama nga agturong iti resesyon wenno lalo a panagtumal kadagiti umay a bulan. Lalo a pakpakaruen ti krisis ti sangun-sango ken dadakkel a korapsyon ti agari-ari a bunggoy ti Marcos ken panaggastar iti nagdakkelan a badyet militar.

Agsusuek ti pangkabiagan ken tukad ti biag ti nalawa a masa nga anak ling-et ken petiburgesya. Awan-anawa ti panagngato ti presyo ti krudo, taraon ken dadduma pay a kangrunaan a gagatangen, kabayatan a nakurang ti sweldo ken pastrek uray nu agmalmalem ti panagtegged. Iti uneg dagiti patakaran a neoliberal, milyun-milyon ti awanan pangkabiagan, maag-agawan ti daga, ken mapapaidaman ti pagbirukan (dagiti mangngalap, agtagilako, dagiti karinderya, drayber ken opereytor ti dyip) dagiti ganggannaet a kumpanya ken dagiti kasosyo a dadakkel a kapitalista. Nailumlom iti pitak ti kinarigat ken pannaka-irurumen ti mayorya dagiti pamilya a Pilipino.

Magagaran ni Marcos nga ilibre iti buwis, ikkan ti daga, armado a pwersa ken salaknib ken dadduma pay a pribilehiyo dagiti ganggannaet a dadakkel a kapitalista ken kasosyo da a lokal nga dadakkel a burgesya kumprador, dagiti kroni ken burukrata kapitalista. Iti bangir a benneg, aginbibingngeg isuna iti arungaing ti masa nga anak ling-et ken sibubukel nga umili a Pilipino para iti nayon a sweldo, pudno a reporma iti daga, panagkissay iti presyo, pangkabiagan, ken dadduma pay a sigida a kasapulan.

Apagtugaw, insigida a nagpakaasi ni Marcos iti imperyalista a US. Kasaruno ti patakaran ti US a tubngaren ti lumawlawa a bileg pang-ekonomya ken pang-militar ti China, inikkan-dalan ni Marcos ti panangpadakkel ti presensya militar ti US ken pinalubusan nga usaren ti pagilian kas dakkel a base militar.

Iti tengnga ti krisis iti ekonomya ken bumasbassit a kinabaknang a paggugudua-an, umun-uneg ti riri kadagiti agriribal a bunggoy ti agari-ari a dasig, uray iti baet mismo ti agari-ari a bunggoy ti Marcos-Duterte, nga agpada a bukatot iti kinabaknang ken bileg. Nakalatlatak ti panagbinnangga dagiti bunggoy ti Marcos-Duterte.

Nakalawlawag iti umili a kontra-marigrigat ken kontra umili ti rehimen a US-Marcos. Naan-anay a nakasina ti agari-ari a rehimen Marcos iti masa a Pilipino. Kagurgura daytoy ti umili gapu iti panagbalin a taga-tawid ti diktadura a Marcos, ken gapu iti nasaknap a panagkusit ken manipulasyon iti resulta ti eleksyon 2022 tapno makatugaw iti poder. Lallalo pay daytoy itatta a kagurgura gapu iti nakaam-ames ken aglaplapusanan a panagbiag ken panangwaldas ti kwarta ti umili kadagiti biahe ken pasken, kabayatan a nailumlom ti masa nga umili iti nalawa a panagrigat ken panagbisin.

Awan-sarday ti panangikuspil ti estado iti turay ti rehimen a US-Marcos. Pagar-aryen ti kigtot ken buteng babaen kadagiti maka-ayup a pasista nga taktika kas iti pammapatay, panagdukot, panagtortyur, pangmabayagan a panangibalud, usar dagiti ar-aramid a kaso, ken panangipupok kadagiti binukel a komunidad kadagiti garison ti militar. Iti tengnga ti krisis, ap-apputan daytoy ti umili iti awan kaes-eskan a panggep a parmeken dagiti arungaing ken panaglaban da. Ngem isursuro met daytoy iti masa nga awan sabali a pagpaarayatan da nu saan a ti panagkaykaysa ken makidangadang tapno salakniban dagiti karbengan da, ngem iti naan-anay a pannaka-ilumlom iti rigat ken pannakatay.

Parparnuayen ti krisis dagiti kundisyon pabor iti lalo a panangriing, panang-organisa ken panang-patignay iti masa. Adda iti posisyon ti Partido nga ida-uluan dagiti dumakdakkel a pannakidangadang masa ken papigsaen ti rebolusyonaryo a tignayan ti masa agpada iti syudad ken kaaw-awayan, iti balabala ti kabuklan a panagabante ti demokratiko a rebolusyon ti umili.

Tapno epektibo a maida-uluan ti umili a Pilipino, kasapulan a maringbawan ken tallikudan ti Partido dagiti naduma-duma a langa ti konserbatismo, repormismo, ligalismo, a manglaplapped iti panagabante ti umili iti dalan ti panaglaban. Rumbeng a patibkeren ti pakinakem, tured ken militansya ti masa a lumaban.

Iti panangidaulo ti Partido ken dagiti rebolusyonaryo a pwersa, rumbeng a papigsaen dagiti pannakidangadang masa a pang-ekonomya kadagiti amin a demokratiko a dasig ken sektor, aglalo ti masa a mangmangged ken mannalon a mangbukbukel iti mayorya ti umili, kasta met ti dadduma a sektor ti masa nga anakling-et ken petiburgesya. Pagumluongen iti amin a suli ti pagilian ti pukkaw da para iti pagsayaatan ken karbengan, ken iti panangtubngar iti pasista ken parigat a rehimen nga US-Marcos.

Naan-anay nga ibutaktak dagiti ganggannaet a monopolyo kapitalista a bangko ken korporasyon nga adda iti likudan ti panaggamrud ken panangparigat iti umili a Pilipino. Kasta met, a papigsaen dagiti pannakidangadang laban iti pannakibiang militar ti US iti Pilipinas ken ilaban ti nailian a wayawaya iti tengnga ti tumataud nga armado a risiris dagiti imperyalista a bileg.

Agipinget a paregtaen dagiti anti-pasista a pannakidangadang. Agdoble-kayod iti panangibutaktak ti terorismo ti estado iti kaaw-awayan. Ilaban ti hustisya para kadagiti amin a biktima ti pasista a krimen. Ingato ti kabaelan ken determinasyon ti masa a lumaban iti ligal ken dadduma pay a pamuspusan.

Buklen ti kalalawaan nga intar ti agkaykaysa a prente nga anti-Marcos ken naan-anay nga isina ti agari-ari a rehimen Marcos iti umili. Kagiddan na, rumbeng a naregget nga iduron ti panangpasungbat kenni Duterte ken dagiti kakumplot daytoy kadagiti pasista a krimen, panagkusit iti eleksyon ken korapsyon. Allukuyen ti aktibo a pannakilaok dagiti akintengnga a seksyon ti umili laban iti panagari ti rehimen a US-Marcos.

Sigurado a pumigsa dagiti pannakidangadang masa kadagiti umay a bulan, kagiddan ti panagpigsa ti armado a pannakidangadang iti kaaw-awayan ken panagkaro ti krisis ti agari-ari a sistema. Rumbeng a papigsaen ti New People’s Army tapno biraen dagiti pasista a kriminal ken salakniban ti umili.

Uyusen ken urnungen ti pungtot iti barukong ti masa ken iturong iti rehimen Marcos ken bunggoy a Duterte. Iyabante ti rebolusyonaryo a tignayan masa ken armado a pannakidangadang tapno labanan ken gunggunen ti panagari-ari ti rehimen a US-Marcos.