Naibutaktaken iti publiko ti nabaybayagen nga agburburek a risiris iti nagbaetan dagiti Marcos, Arroyo ken Duterte iti nagsasaruno nga atake ken kontra-atake dagiti taw-an dagitoy. Lalo a kimmaro daytoy a dinnungpar iti tengnga ti krisis iti ekonomya ken gapu ta aminen ket saan a mabsug wenno marnek iti panagguguddua da iti kinabaknang, bileg ken pribilehiyo ti estado.

Kalatakan ti rinnikiar iti nagbaetan ti daulo ti Kongreso a ni Martin Romualdez ken bise presidente a ni Sara Duterte. Nagnumaran ni Romualdez ti nalawa ken napennek a panagtubngar ti umili iti confidential ken intelligence funds ken panangikkat daytoy iti badyet iti 2024 ni Duterte kas bise-presidente ken sekretarya ti Department of Education. Gimmil-ayab met ti sinnungbat ti kampo ni Romualdez ken sigud a presidente a ni Rodrigo Duterte kalpasan a pangtaan ti naudi a “papatayen” ni Rep. France Castro, mangibagbagi ti ACT Teachers Partylist ken deputy minority leader iti kongreso, a nangiyuna iti panangibutaktak ken pananglaban iti CIF.

Naiduron daytoy a dinnungpar ti adu a panagikkat dagiti ka-partido ni Duterte iti PDP-Laban—a manipud 120 ket addaan laengen 15 a miyembro iti Kongreso. Karaman kadagiti immikkat ni Rep. Aurelio Gonzales Jr a nangitudo kenni Duterte nga adda iti likudan dagiti atake ken panagpangpangta iti Kongreso.

Idi Nobyembre 7, awan an-aniaman nga inikkat kas deputy speaker ti Kongreso ni Gloria Macapagal-Arroyo, karibal ni Romualdez ken alyado dagiti Duterte. Kagiddan na nga inikkat ti pada na nga deputy speaker a ni Rep. Isidro Ungab, mangibagbagi ti maikatlo a distrito ti Davao City. Agpada a saan a pimmirma ni Arroyo ken Ungab iti maysa a resolusyon a direkta a nangmandar nga “iwaragawag” dagiti kongresista ti “panagyaman, pannakikaykaysa ken suporta” kenni Romualdez.

Maniobraan a militar

Idi Nobyembre 3, imbutaktak ni Gen. Romeo Brawner, hepe ti AFP, ti nakuna na a “dagiti panggep a destabilisasyon,” babaen ti kudeta, laban kenni Ferdinand Marcos Jr. Kunana, idurduron daytoy dagiti retirado nga upisyal ken ilaklako kadagiti adda iti aktibo a serbisyo.

Inlibak ti sigud a sekretaryo ti Information and Communications Technology a ni Eliseo Rio, maysa a sigud nga opisyal militar ken maysa kadagiti nangitakder ti grupo a TNTrio, nga agpangpanggep da ti “destabilisasyon.” Kunana, ti kampanya da, kadua ti September Twenty-One Reform Movement, ket ti panangrepaso iti napalabas nga eleksyon presidensyal tapno paneknekan ti nasaknap nga elektroniko a panagkusit a nangipwesto kenni Marcos Jr ken Sara Duterte iti poder.

Pinaawan met kinaagpayso na ti National Security Council (NSC) nga adda agraraira a panggep nga destabilisasyon ken imbaga nga “nagbiddut” laeng dagiti reporter iti panagawat. Naginkukuna met ti nataengan a Duterte nga adda kaammuan na iti “tungtungan” kalpasan nga inaklon nga adda dagiti kinatungtong na a retirado nga heneral.

Pangta ti panang-aresto

Idi Nobyembre 14, nawayawayaan babaen ti panagpyansa ni Sen. Leila de Lima manipud iti maikatlo ken maudi a kaso mainaig iti “gerra kontra-droga” ni Duterte. Agarup pito tawen a nakabalud ti senadora kadagiti kaso a nakabasar kadagiti testimonya dagiti napaneknekan a kriminal. Inggagara a linipit ni de Lima gapu iti panangiyun-una na iti imbestigasyon iti panangiraman na kenni Duterte kadagiti panangpapatay ti “Davao Death Squad” ken iti panagbalin a numero uno a kritiko ti “gerra kontra-droga” iti Senado.

Iti temporaryo a pannakawayawaya na, nagkari ni de Lima a makitinnulong iti International Criminal Court (ICC) nu sadinno a nakasuan ni Duterte kadagiti krimen laban iti sangkataw-an. Matuloyen ti imbestigasyon kenni Duterte iti bangir ti panangikagumaan na nga idiskaril daytoy. Patpatapawen met ti bunggoy a Marcos ti posibilidad a pagtutungtungan iti Kongreso dagiti basaran ti kaso na iti ICC.