Tatlo ka Pulang hangaway ang ginpatay samtang yara sa kustodiya sang militar sining nagligad nga duha ka semana. Sa Oriental Mindoro, nadakop kag hungod nga ginpatay sang 203rd IBde ang mga Pulang hangaway sang Bagong Hukbong Bayan (BHB)-Mindoro nga sila ni Jethro Isaac Ferrer (Ka Pascual) kag Peter Rivera (Ka Rochie) sa Barangay Buong Lupa, Gloria sadtong Nobyembre 13. Ginpagwa nga napatay sila sa isa ka hinimo nga engkwentro sa amo man nga adlaw. Gindakop man diri si Ka Jasel kag wala pa ginapakita tubtob subong.

Sa Sultan Kudarat, gindakop kag hungod man nga ginpatay sang 37th IB ang Pulang hangaway nga si Rafael Zambrano (Ka Dodong/Tres) sadtong Oktobre sa Sityo Surong, Barangay Hinalaan, Kalamansig, Sultan Kudarat. Nadakop si Zambrano sa isa ka balay sa Sityo Bugkog, Barangay Limulan sadtong Oktober 8 kag ginpaidalom sa tortyur. Pagdangat sang Oktobre 11 sang aga, nasapwan ang iya nga bangkay halin sa ginpagwa sang militar nga “engkwentro” sang gab-e sang Oktobre 10 sa Sityo Kalamagan, Barangay Limulan.

Sa Negros Occidental, ginpatay sang mga pwersa sang 15th IB ang mga mangunguma nga sila ni Waren Cadarin kag Jovy Moreño kag ginpagwa nga napatay sa isa ka hinimo nga engkwentro sa Barangay Yaoyao, Cauayan sadtong Nobyembre 7. Si Cadarin ang gin-abdak sang mga suldado sa iya ulumhan sa Sityo Indangawan, Barangay Manlucahoc, Sipalay sadtong Nobyembre 4. Ginbalita siya nga nadula sang iya pamilya sa pulisya kag lokal nga radyo.

Pag-aresto. Gindakop kag ginbilanggo sang mga suldado sang 94th IB kag lokal nga pulis ang mga sibilyan nga sila ni Joel Casusa kag Jenny Radles sadtong Nobyembre 8 sa Sityo Pisok, Barangay Buenavista, Himamaylan City, Negros Occidental. Si Casusa ang anay pangulohan sang lokal nga asosasyon sang mga mangunguma sa Barangay Buenavista, samtang si Radles ang aktibo nga katapo sang grupo. Daan na nga biktima sang iligal nga pag-aresto si Casusa sadtong 2019. Ginpagwa sang militar nga mga katapo sila sang BHB nga nadakop pagkatapos ang isa ka engkwentro sa lugar.

Pag-abdak. Sa Batangas, sundanay nga gin-abdak sang mga pwersa sang estado ang organisador sang mangingisda nga si mariano Jolongbayan sadtong Nobyembre 17 sa Lian kag si Karla Mae Monge, organisador sang pamatan-on, sadtong Nobyembre 20 sa banwa sang Tuy. Nagapanawagan ang ila mga himata nga luwas nga ipakita kag buy-an ang duha.

Pagpang-ipit. Gina-ipit kag ginapahog sang mga pwersang militar ang pamilya sang aktibista nga si Kristel Asilom, lider-pamatan-on sang Anakbayan-Bulacan sadtong Nobyembre 11. Sa Davao City, gin-ipit naman sang mga elemento sang NTF-Elcac ang lider-mamumugon nga si Paul John Dizon sadtong Nobyembre 13. Pareho nga ginkadtuan sang mga suldado ang balay sang ila mga himata. Sa kaso ni Dizon, ginpaandaman siya nga pagapasakaan sang mga kaso nga kriminal kung indi magkooperar.

Pagpangukay. Ginsulod kag ginpangukay sang mga suldado sang 62nd IB ang balay sang mangunguma nga si Maximo Cañete sa Barangay Amontay kag Melvin Vilando sa Barangay Santol, pareho sa Binalbagan, Negros Occidental sadtong Nobyembre 13. Ginpasibangdan sila nga mga tigsuporta sang hangaway sang banwa kag ginpaandaman nga pagapatyon.