Ginabayo subong sang dulolongan nga krisis sa ekonomiya kag pulitika ang garok nga nagaharing sistema sa pungsod. Sa atubang sang nagalala nga pag-antus sang pumuluyong Pilipino sa tunga sang krisis, ilabi nga nagadilaab ang ila nga determinasyon nga maghimakas para sa ila palangabuhian kag kaayuhan, pangapinan ang ila demokratiko nga kinamatarung kag ipakigbato ang interes sang pungsod batuk sa dumuluong nga pagpanghugakom kag pagpang-ulipon.

Nagasangyad ang ekonomiya sang pungsod nga naghatag-duot sa pagkahagmak sang manupaktura kag agrikultura, pagkabangkarote sang pungsod kag ilabi nga pagkalubong sa utang. Tungod nga nagaid sa pangkalibutanon nga sistemang kapitalista nga naga-agom subong sang istagnasyon, ang ekonomiya sang Pilipinas ang ginalauman nga magapadulong sa resesyon ukon ilabi nga paghinay sa mga maabot nga binulan. Ilabi nga ginapalala ang krisis sang klaro kag dalagkuan nga korapsyon sang nagahari nga guban ni Marcos kag pag-usik sa dalagko nga gasto militar.

Gausmod nga nagausmod ang palangabuhian kag lebel sang kabuhi sang malapad nga masang anakbalhas kag petiburgesya. Wala pugong ang pagtaas sang presyo sang lana, pagkaon kag iban pa nga nagapanguna nga balaklon, samtang tuman ka kulang ang sweldo kag kita sa pihak sang bilog-adlaw nga pagpangabudlay. Sa idalom sang mga neoliberal nga patakaran, minilyon ang wala sang palangabuhian, ginaagawan sang duta, kag gindingutan sang palangitan-an (mga mangingisda, tindera, mga karenderya, drayber kag opereytor sang jeep) sang mga dumuluong nga kumpaniya kag mga kahimbon nga mga dalagko nga kapitalista. Lubong sa lunang sang kaimolon kag pagkaulipon ang mayorya sang mga pamilyang Pilipino.

Nagaluhod si Marcos nga ilibre ang buhis, hatagan sang duta, armado nga pwersa kag proteksyon kag iban pa nga pribilehiyo ang dumuluong nga dalagkong kapitalista kag kahimbon sini nga lokal nga dalagkong komprador burgesya, mga gaway kag burukrata kapitalista. Sa pihak nga bahin, nagapabungol-bungol siya sa hibubun-ot sang masang anakbalhas kag bug-os nga pumuluyong Pilipino para sa pasaka sa sweldo, matuod nga reporma sa duta, pagbuhin sa presyo, palangabuhian, kag iban pa nga hinanali nga kinahanglanon.

Pagpungko pa lang, gilayon nga nagpakitluoy si Marcos sa imperyalistang US. Pagkatapos sang patakaran sang US nga kontrahon ang nagalapnag nga gahum pang-ekonomiya kag pangmilitar sang China, ginhatagan-ligwa ni Marcos ang pagpadako sang presensya militar sang US kag gintugutan nga gamiton ang pungsod bilang dako nga base militar.

Sa tunga sang krisis sa ekonomiya kag nagagamay nga manggad nga pagabahinon, nagadalom ang inaway sa mga nagabanggianay nga guban sang nagahari nga sahi, mangin sa tunga mismo sang nagahari nga guban sang Marcos-Duterte, nga pareho nga dalok sa manggad kag gahum. Tuman ka lutaw ang kinagamo sang mga guban nga Marcos kag Duterte.

Tuman ka athag sa pumuluyo nga kontra-imol kag kontra-pumuluyo ang rehimen US-Marcos. Lubos nga nahamulag ang nagahari nga rehimen Marcos sa masang Pilipino. Tuman ini nga ginaka-initan sang pumuluyo tungod sa pagka tigpanubli sang diktadurang Marcos, kag tungod sa lapnagon nga pagpangdaya kag manipulasyon sa resulta sang eleksyon 2022 agud makapungko sa poder. Ilabi pa ini subong nga ginaka-initan tungod sa makadiligwa nga pagpangabuhi sa luho kag pagpagusa sang kwarta sang pumuluyo sa mga biyahe kag hiwat, samtang lubong ang masa sang pumuluyo sa lapnagon nga kaimolon kag kagutoman.

Wala untat ang pagpangdaog-daog sang estado sa idalom sang rehimen US-Marcos. Ginapatigbabaw ang kahangawa kag kahadlok paagi sa sapat-sapaton nga pasistang taktika pareho sang pagpamatay, pag-abdak, pagtortyur, madugayon nga pagbilanggo gamit ang imbento nga mga kaso, kag pagbilanggo sang bilog nga komunidad sa mga garison sang militar. Sa tunga sang krisis, ginabusalan sini ang pumuluyo sa wala-pulos nga katuyuan nga sumpuon ang ila mga hibubun-ot kag pagbato. Apang ginatudlo man sini sa masa nga wala sila sang iban nga pasingadtuan kundi ang mag-ugyon kag maghimakas agud pangapinan ang ila mga kinamatarung, kaysa sa lubos nga mahagmak sa kalisdanan kag kamatayon.

Gintuga sang krisis ang mga kundisyon nga pabor sa ilabi nga pagpukaw, pag-organisa kag pagpahulag sa masa. Yara sa pusisyon ang Partido nga pamunuan ang nagadako nga mga paghimakas masa kag pabaskugon ang rebolusyonaryo nga kahublagan masa sa kasyudaran kag kabukiran, sa balayon sang kabilugan nga pagsulong sang demokratikong rebolusyon sang banwa.

Agud epektibo nga mapamunuan ang pumulyong Pilipino, kinahanglan nga panginbabawan kag isikway sang Partido ang nagkalain-lain nga porma sang konserbatismo, repormismo, ligalismo, nga nagapugong sa pagsulong sang pumuluyo sa banas sang pagbato. Dapat nga pabakuron ang kaugalingon, kaisog kag militansya sang masa nga magbato.

Sa pagpamuno sang Partido kag mga rebolusyonaryong pwersa, dapat ilabi nga pabaskugon ang mga paghimakas masa pang-ekonomiya sang tanan sang demokratikong sahi kag sektor, mas ilabi sang masang mamumugon kag mangunguma nga amo ang nagabug-os sang mayorya sang pumuluyo, amo man sang iban nga sektor sang masang anakbalhas kag petiburgesya. Palanugon sa tanan nga suok sang pungsod ang singgitan nila para sa ila kaayuhan kag mga kinamatarung, kag sa pagbato sa pasista kag paantus nga rehimen US-Marcos.

Matutom nga ibuyagyag ang mga dumuluong nga monopolyo kapitalista nga bangko kag korporasyon nga yara sa likod sang pagpangawat kag pagpaantus sa pumuluyong Pilipino. Amo man, pabaskugon ang mga paghimakas batuk sa pagpasilabot militar sang US sa Pilipinas kag ipakigbato ang pungsodnon nga kahilwayan sa tunga sang nagakadihon nga armadong kinagamo sang mga imperyalistang gahum.

Ilabi pa nga papagsikon ang anti-pasista nga mga paghimakas. Magdoble-paninguha sa pagbuyagyag sang terorismo sang estado sa kabukiran. Ipakigbato ang katarungan para sa tanan nga biktima sang pasista nga krimen. Itib-ong ang ikasarang kag determinasyon sang masa nga magbato sa ligal kag iban pa nga pamaagi.

Tukuron ang pinakamalapad nga hanay sang nagahiliugyon nga prente nga anti-Marcos kag lubos nga ihamulag ang nagahari nga rehimen Marcos sa pumuluyo.

Kadungan, dapat maukod nga iduso ang pagpasabat kay Duterte kag mga kahimbon sini sa mga pasista nga krimen, pagpangdaya sa eleksyon kag korapsyon. Buyukon ang aktibo nga pagpakigbahin sang mga nahanunga nga seksyon sang pumuluyo batuk sa paghari sang rehimen US-Marcos.

Sigurado nga magabaskog ang paghimakas masa sa maga-abot nga binulan, kadungan sang pagbaskog sang armado nga paghimakas sa kabukiran kag paglala sang krisis sang nagahari nga sistema. Dapat nga pabaskugon ang Bagong Hukbong Bayan agud bunalan ang pasistang kriminal kag pangapinan ang pumuluyo. Kuhaon kag tipunon ang kaakig sa dughan sang masa kag ition sa rehimen Marcos kag Duterte nga hubon. Isulong ang rebolusyonaryong kahublagan masa kag armado nga paghimakas para batuan kag tay-ugon ang paghari sang rehimen US-Marcos.