Nagapabilin nga nalansang sa manubo nga lebel ang sweldo sa Pilipinas sa atubang sang sinsilyo nga dugang-sweldo nga ginsugo sang mga regional wage board sa nagligad nga lima ka bulan. Tuman ka kulang ini agud makasabat ang mga pamilya nga mamumugon sa tayog nga pagtaas sang mga presyo sang balaklon, ilabi na sang pagkaon kag lana.

Sadtong Setyembre, natunaw sang 28% ang matuod nga kantidad sang sweldo tuga sang implasyon. Sa NCR, ₱504 na lang ang matuod nga kantidad sang nagakadawat nga minimum nga ₱610. Wala pa ini katunga sang ₱1,189 kada adlaw nga lebel sang makabuhi nga sweldo. Sa abereyds, 35.5% lang sa makabuhi nga sweldo ang nagakadawat sang mga mamumugon sa bilog nga pungsod. Bisan nagnubo ang implasyon sadtong Oktobre, nagapabilin nga mas manubo sa dulunan sang kaimolon (₱12,040/bulan) ang nagakadawat nila nga abereyds ₱9,158 kada bulan. Tuman ka layo ini sa makabuhi nga swelddo nga ₱25,816 kada bulan sadtong Oktubre.

“Mahinay” kag “sinsilyo” ang sabat sa mga petisyon para sa dugang-sweldo nga ginhan-ay sang mga unyon kag sentro sang pamugon nga halin sa ₱150 tubtob ₱220. Anom sa mga rehiyon ang nagpasaka sang sinsilyo nga ₱30 kag tatlo nga ₱35. Pinakamataas na ang ₱50 nga dugang-sweldo sa National Capital Region kag pila ka industriya sa Calabarzon. Gamay na gani, “staggered” ukon utay-utay pa ang pagpatuman sini sa pila ka rehiyon. Tubtob subong wala pa sang dugang nga sweldo sa mga rehiyon sang 10, 11 kag 13, amo man sa BARRM, kung sa diin pinakadako ang deperensya sang minimum kag makabuhi nga sweldo.

Mas malala ang ginhatag nga dugang-sweldo sa mga mamumugon sa uma nga ₱20 tubtob ₱40 nga mas manubo kumpara sa mamumugon sa industriya kag serbisyo. Gintawag sang mga mamumugon sa uma nga “limos” ang dugang sa inadlaw nga minimum nga masami pa nga wala ginapatuman sa kabukiran. Sa subong, nagasweldo ang kadam-an sang mga mamumugon sa agrikultura sang halin ₱16 tubtob ₱240 lang kada adlaw.

Ilabi nga indi makabulig ang dugang-sweldo para pataason ang lebel sang sweldo sang kababainhan. Sa pangkabilugan, mas manubo sang 13.9% ang ginadawat sang mga kababainhan nga mamumugon nga minimum ang sweldo kumpara sa kalalakin-an, base mismo sa ahensya sang estadistika sang estado. Mas dako ang kinalain sa mga trabaho nga propesyunal, pareho sang sa nataran sang digital, kung sa diin mas manubo sang 18.4% ang sweldo sang kababainhan kumpara sa kalalakin-an.