Bangis nga giaresto sa mga pwersa sa estado ang pito ka kontra-demolisyong aktibista ug residente sa Sityo Casia, Barangay Bangkal, Lapu-Lapu City, Cebu samtang nagprotesta batok sa iligal nga demolisyon sa 39 ka balay niadtong Nobyembre 28-29. Gidakop sa mga pulis ang upat ka residente nga silang Marjhun Amoroto, Belt Sasar, Lito Padillon ug Cris Gabutan ug ang lider sa Anakbayan-Cebu nga si Kei Galon, si Deviemar Opo sa Anakbayan-Lapu-Lapu, si Howell Villacrucis sa AMA-Sugbo-KMU. Gibuhian sila human ang duha ka adlaw.

Matud sa mga grupo, iligal ang gihimong demolisyon tungod kay wala ni unsamang papeles nga mapakita ang pulis gikan sa korte. Gibutyag sa duha ka grupo nga giangkon mismo kanila sa mga awtoridad nga “sikretong demolisyon” ang nahitabo tungod kay kini walay ligal nga basihan.

Niadtong 2006 pa nagsugod ang pakigbisog sa katawhan sa Sityo Casia alang sa ilang katungod sa pagpanimuyo. Ginaangkon ang maong yuta sa pamilyang Mangura.

Pagpatay. Gipatay sa paturagas nga pagpamusil sa usa ka platun sa 62nd IB ang mag-uumang si Banny Tobalado sa Sityo Karanawan, Barangay Amuntay, Binalbagan, Negros Occidental niadtong Disyembre 6. Giatake sa mga sundalo ang iyang balay bandang alas-5 sa buntag ug gipagawas nga usa ka “engkwentro.”

Pagdagit. Gidagit sa mga pwersa sa estado si Mar Silos, organisador sa mga mangingisda ug mag-uuma, sa Barangay Montecillo, Sariaya, Quezon niadtong Nobyembre 29. Myembro siya sa Pagkakaisa sa mga Magsasaka ug Tagapagtaguyod sa Ikalawang Distrito (PAMATID)-Quezon. Naila siya isip madasigong tigpanalipud sa katungod sa mga mangingisda ug mag-uuma sa Gitnang Quezon.

Pagpamusil. Paturagas nga nagpabuto og pusil ang 50th IB sa Barangay Mataragan, Malibcong, Abra niadtong Nobyembre 20. Ginapagawas sa 50th IB nga adunay “engkwentro” sa maong lugar nga dihadihang gipanghimakak sa Bagong Hukbong Bayan (BHB)-Abra. Bakak usab kuno ang ginaingong nakumpiska sa 50th IB nga usa ka M14, tulo ka M16, usa ka K3 light machinegun, ug duha ka bandolyer.