Mapintas nga gin-aresto sang mga pwersa sang estado ang pito ka kontra-demolisyon nga aktibista kag residente sang Sityo Casia, Barangay Bangkal, Lapu-Lapu City, Cebu samtang nagaprotesta batuk sa iligal nga demolisyon sa 39 ka balay sadtong Nobyembre 28-29. gindakop sang mga pulis ang apat ka residente nga sila ni Marjhun Amoroto, Belt Sasar, lito Padillon kag Cris Gabutan kag ang lider sang Anakbayan-Cebu nga si Kei Galon, si Deviemar Opo sang Anakbayan-Lapu-Lapu, si Howell Villacrusis sang AMA-Sugbo-KMU. Ginhilway sila pagkatapos ang duha ka adlaw.

Pahayag sang mga grupo, iligal ang ginpatigayon nga demolisyon tungod wala sang bisan ano nga papeles nga mapresentar ang pulis halin sa korte. Ginbuyagyag sang duha ka grupo nga gin-ako mismo sa ila sang mga awtoridad nga “sikreto nga demolisyon” ang nahitabo tungod wala ini sang ligal nga basehan.

Sadtong 2006 pa nagsugod ang paghimakas sang pumuluyo sa Sityo Casia para sa ila kinamatarung sa puluy-an. Gin-angkon ang nasambit nga duta sang pamilya Mangura.

Pagpatay. Ginpatay sa patarasak nga pagpaniro sang isa ka platun sang 62nd IB ang mangunguma nga si Banny Tobalado sa Sityo Karanawan, Barangay Amuntay, Binalbagan, Negros Occidental sadtong Disyembre 6. Ginlusob sang mga suldado ang iya balay mga alas-5 sang aga kag gintiro nga ginpagwa sini nga isa ka “engkwentro.”

Pag-abdak. Gin-abdak sang mga pwersa sang estado si Mar Silos, organisador sang mga mangingisda kag mangunguma, sa Barangay Montecillo, Sariaya, Quezon sadtong Nobyembre 29. Katapo siya sang Pagkakaisa ng mga Magsasaka at Tagapagtaguyod sa Ikalawang Distrito (PAMATID)-Quezon. Kilala siya bilang ma-ukod nga tigpangapin sang kinamatarung sang mga mangingisda kag mangunguma sa Gitnang Quezon.

Pagpaniro. Patarasak nga nagpalupok sang pusil ang 50th IB sa Barangay Mataragan, Malibcong, Abra sadtong Nobyembre 20. ginpagwa sang 50th IB nga may yara sang isa ka “engkwentro” sa nasambit nga lugar nga gilayon ginpanginwala sang Bagong Hukbong Bayan (BHB)-Abra. Kabutigan man kuno ang ginahambal nga pagkakuha sang 50th IB sang isa ka M14, tatlo ka M16, isa ka K3 light machinegun, kag duha ka bandolyer.