Sugod Nobyembre 24 tubtob 30, temporary nga gin-untat sang Israel ang pagpamomba sa Gaza agud mapatigayon ang “prisoner swap” kung sa diin ginhilway sang Hamas ang 105 sa 345 nga gindakop sini sa operasyon nga Al Aqsa Flood kabaylo ang 240 sa halos 10,000 Palestino nga napriso sa Israel. Kabahin sa mga ginhilway sang Hamas ang duha ka Pilipino nga migranteng mamumugon.

Pagkatapos sang 6 ka adlaw nga “makitawhanon nga dinaliay nga untat-lupok,” Disyembre 1, alas-7 sang aga sa Palestine, liwat nga ginbuy-an sang Israel ang mga eroplanong pang-gyera sa Gaza. Sa sulod sang masunod nga 24-oras, naglab-ot sa 184 ang mga Palestino nga napatay, 589 ang pilason kag 20 ka balay ang naupos sang ginhulog ang mga bomba. Bag-o sini, masobra 15,000 Palestino na ang napatay sa pagpamomba sang Israel. Sobra 5,300 sa ila ang mga bata.

Tanan nga mga eroplano nga gingamit sang Israel ang halin sa US kag tanan nga mga bomba nga ginhulog sini ang mga bombing Amerikano. Sa kabilogan, 80% sang mga armas sang Israel ang himo-US.

Pagpondo sa Zionismo

Ginbun-ag kag ginpapabilin sang imperyalistang US ang halimaw nga Zionistang estado sang Israel. Halin Ikaduha nga Gyerang Pangkalibutan, nagdawat ini sang $146 bilyon, nga pinakadako sa ayuda nga ginhatag sang US sa mga pungsod nga alyado kag malakolonya sini. Halos tanan ini ang yara sa porma sang ayuda militar, magluwas sa pila ka tuig nga nagtigana sang ayuda pang-ekonomiya ang US para himuon nga “industriyalisado” ang pungsod.

Yabi ang higante nga pondo nga ini sa pagpauswag sa Zionista nga pasistang makinarya. Bag-o ginlunsar ang Al Aqsa Flood, kung sa diin nasulod sang mga pwersang Palestino ang nagkalain-lain nga kampo kag lugar sa Israel, ginapadayaw ini nga “pinakasopistikado nga militar sa bilog nga kalibutan hambalanon sa teknolohiya.” Gamit man ang ayuda nga ini para tukuron kag pauswagon ang industriya sang armas sang Israel nga kahimbon sang monopolyo nga mga kumpanyang armas nga Amerikano. Pila sa pinakadalagko ang mga kumpanya nga Elbit Systems, Israel Aerospace Industries kag Rafael.

Sa kasamtangan nga henosidyo sini sa Gaza, ginpabakod sang Kongreso sang US ang sugyot nga hinanali nga dugangan sang $14.3 bilyon ang anay tuigan nga $3.3 bilyon nga ayuda militar sa Israel. Ang ayuda nga ini ang yara sa porma sang mga misayl nga Hellfire, 55mm pangbala sa kanyon, night-vision, mga armas nga “bunker-buster” (pangkontra sa mga tunnel) kag bag-o nga mga salakyan militar. Dugang ang mga ini sa daan na nga ginasuplay sang US nga mga misayl para sa Iron Dome kag mga bomba nga ginahulog sang mga eroplano. Ginasuplayan man sang US ang Israel sang mga kemikal kag bayolohikal nga materyal pang-gyera.

Ginatantya nga $48 bilyon na ang ginbubo sang Israel sa manog duha ka bulan na nga kampanyang henosidyo. Sangkatlo sa kantidad nga ini ang gin-abaga sang US.

Bugtong nga papel sa Middle East

Sa kaidadalman sini, nagaluntad ang Zionista nga estado kag pasista nga makinarya sang Israel para ipabilin ang hegemonya sang US sa Middle East. Sugod pa dekada 1980, ginbutang sang US diri ang weapon stockpile ukon imbakan sang armas nga pinakadako sa gwa sa kaugalingon nga pungsod, bilang pagsiguro nga madasig ini mapwesto ang mga armas kung magdilaab ang anuman nga “panrehiyon nga kinagamo.” Natago sa sulod sang pungsod ang gintawag nga War Reserve Stockpile Allies-Israel ukon WRSA-I nga kontrolado sang US. Tuig-tuig, nagatigana ang US sang $200 milyon para hulipan ang mga nagamit sa mga armas diri. May kasubong nga imbakan sa South Korea kag Japan, kag nagahanda subong ang US sang mga pasilidad sa Pilipinas para diri.

Sadtong Oktobre, ginduso ni Joseph Biden, presidente sang US, nga kakson ang mga restriksyon sa pagkuha sang Israel sang armas sa imbakan nga ini para hilway sini nga magamit ang mga armas sang US sa henosidyo sa Gaza.

Gintugyan sang US sa Israel ang istatus nga “mayor na alyado nga di-NATO” kag hugot nga ginsugpon ang pasista nga hukbo sini sa hukbong Amerikano. Sugod 1983, timbanganay nga ginapauswag sang US kag Israel ang Israel Defense Forces, nga sa aktwal isa ka pwersa nga opensiba para sa maduguon nga kampanyang pagpanakop sa mga teritoryong Palestino.

Nagamantine man sang kaugalingon nga pwersa ang US sa sulod sang Israel, dugang sa tingob nga linibo ka naka-istasyon sa nagkalain-lain nga pungsod sa Middle East. Sadtong 2017, ginsapubliko sang US ang konstruksyon sang permamente nga baseng Amerikano sa sulod sang isa ka kampo militar sang Israel sa disyerto nga Negev, nga may kalayuon nga 20 kilometro sa Gaza. Duha ka bulan bag-o ang Al Aqsa Flood, nagbubo ang US sang $35.8 milyon para pasangkaron ang sikreto nga base nga ini, nga gintawag nga “Site 512” kag gintawag nga “base sa sulod sang isa ka base.”