Gikan Nobyembre 24 hangtud 30, temporaryong gihunong sa Israel ang pagpamomba sa Gaza aron mapahigayon ang “prisoner swap” kung asa gibuhian sa Hamas ang 105 sa 345 nga gidakop niini sa operasyong Al Aqsa Flood bugti ang 240 sa halos 10,000 ka Palestinong nakabilanggo sa Israel. Lakip sa mga gibuhian sa Hamas ang duha ka Pilipinong migranteng mamumuo.

Human ang 6-ka-adlaw nga “makitawhanong hunong-buto,” Disyembre 1, alas-7 sa buntag sa Palestine, subling gibuhian sa Israel ang mga eroplanong iggugubat sa Gaza. Sulod sa misunod nga 24-oras, mikabat sa 184 ang mga Palestinong napatay, 589 ang nasamdan ug 20 ka balay ang napulbos sa gihulog nga mga bomba. Ayha niini, kapin 15,000 ka Palestino na ang napatay sa pagpamomba sa Israel. Kapin 5,300 kanila mga bata.

Ang tanang mga eroplanong ginagamit sa Israel naggikan sa US ug tanang bombang ginahulog niini mga bombang Amerikano. Mokabat sa 80% sa mga armas sa Israel ang hinimo sa US.

Pagpondo sa Zionismo

Gimugna ug gipabilin sa imperyalistang US ang halimaw nga Zionistang estado sa Israel. Gikan sa Ikaduhang Gubat Pangkalibutan, midawat kini og $146 bilyon, nga pinakadaku nga ayudang gitanyag sa US sa mga nasud nga alyado ug malakolonya niini. Halos tanan sa porma sa ayudang militar, gawas sa pipila ka tuig kung asa naggahin ang US og ayudang pang-ekonomya aron himuong “industriyalisado” ang nasud.

Yawe ang maong higanteng pondo sa pagpalambo sa Zionistang pasistang makinarya. Ayha gilunsad ang Al Aqsa Flood, kung asa nasulod sa mga pwersang Palestino ang lain-laing kampo ug dapit sa Israel, gipanghinambog kining “pinaka-antigong militar sa tibuok kalibutan sa hisgutanan sa teknolohiya.” Gigamit usab ang maong ayuda para tukuron ug palambuon ang industriya sa armas sa Israel nga kasosyo sa monopolyong mga kumpanyang armas sa Amerika. Lakip sa pinakadagku mao ang mga kumpanyang Elbit Systems, Israel Aerospace Industries ug Rafael.

Sa kasamtangang henosidyo niini sa Gaza, gisagop sa Kongreso sa US ang sugyot nga hinanaling dugangan og $14.3 bilyon ang kanhing tinuig nga $3.3 bilyong ayudang militar para sa Israel. Ang maong hinabang nagkinaiya sa mga misayl nga Hellfire, 55mm bala sa mga kanyon, night-vision, mga armas nga “bunker-buster” (pangkontra sa mga tunnel) ug bag-ong mga sakyanang militar. Dugang kini sa kanhi nang ginasuplay sa US nga mga misayl alang sa Iron Dome ug mga bombang ginahulog sa mga eroplano. Ginasuplayan usab sa US ang Israel og mga kemikal ug bayolohikal nga himang iggugubat.

Gibanabanang, $48 bilyon na ang gibubo sa Israel sa magduha ka bulan nang kampanyang henosidyo. Gitubag sa US ang 1/3 niini.

Espesyal nga papel sa Middle East

Sa lintunganay, nagatunhay ang Zionistang estado ug pasistang makinarya sa Israel aron ipalungtad ang hegemonya sa US sa Middle East. Sukad dekada 1980, gimantine sa US dinhi ang weapon stockpile o tipiganan sa armas nga pinakadaku nga anaa gawas sa kaugalingong nasud, sa panigurong paspas kining mapwesto sa panahong moulbo ang unsamang “rehiyonnal nga kaguliyang.” Nakatago sulod sa Israel ang gitawag nga War Reserve Stockpile Allies-Israel o WRSA-I nga kontrolado sa US. Matag tuig, nagagahin ang US og $200 milyon aron hulipan ang nagamit nga mga armas niini. Adunay susamang tipiganan sa South Korea ug Japan, ug nangandam karon ang US sa mga pasilidad sa Pilipinas alang dinhi.

Niadtong Oktubre, giduso ni Joseph Biden, presidente sa US, nga tangtangon ang mga restriksyon sa pagkuha sa Israel og armas sa maong mga tipiganan aron gawasnon niining magamit ang mga armas sa US sa henosidyo sa Gaza.

Gitanyag sa US sa Israel ang istatus nga “mayor nga alyadong dili myembro sa NATO” ug hugot nga gisumpay ang pasistang hukbo niini sa hukbong Amerikano. Sukad 1983, hiniusang gipalambo sa US ug Israel ang Israel Defense Forces, nga sa aktwal usa ka pwersang opensibo o pang-atake alang sa maduguong kampanyang pagpanakop sa mga teritoryong Palestino.

Nagmantine usab og kaugalingong pwersa ang US sulod sa Israel, dugang sa gatusan ka libong nakaistasyon sa lain-laing nasud sa Middle East. Niadtong 2017, gihikyad sa US ang konstruksyon sa permanenteng baseng Amerikano sulod sa usa ka kampo militar sa Israel sa disyertong Negev, nga adunay gilay-ong 20 kilometro gikan sa Gaza. Duha ka bulan ayha ang Al Aqsa Flood, nagbubo ang US og $35.8 milyon aron palapdon ang sikretong base niini, nga giilang “Site 512” ug gitawag nga “base sulod sa usa ka base.”