Walay hunong nga ginaduaw si Rodrigo Duterte sa kalag sa iyang pasismo ug krimen batok sa katawhan. Kadungan sa subling pag-abli sa pultahan alang sa imbestigasyon sa International Criminal Court (ICC) batok kang Duterte ug sa iyang mga alipures, nabutyag ang bag-ong impormasyon mahitungod sa usa ka kaso sa pagmasaker sa mga Lumad sa Agusan del Sur.

Niadtong Marso 15, 2020, linuog nga gimasaker sa mga tropa sa 88th IB ang lima ka Higaonon sa Sityo Canada, Barangay San Vicente, Esperanza, Agusan del Sur. Lakip kanila ang duha ka menor-de-edad. Sa saysay sa mga paryente, gidakop sa mga sundalo silang Jellyboy Hagayhay (12), Ryan Lumista (16), Emon Hagayhay (18), Man-apyagan Lumista (19) Nieto Pasandigon (21), ug Pablo Angkamping (40) dihang masugatan duul sa ilang komunidad. Padulong sila niadtong tungura sa sentro aron magbaligya sa ilang mga produkto.

Gigapos ang unum ug tibuok adlaw nga gitortyur sa mga pasista. Pagka-gabii, gipatay sa mga sundalo ang lima. Gibiling buhi ang batang si Jellyboy. Ang mga patayng lawas sa lima basta na lang gilabog sa mabaw nga bangag ug wala gipahibalo sa pamilya ang lokasyon. Mikabat og usa ka bulan ayha nakaplagan sa pamilya ang bangag ug ang mga patayng lawas nga nakagapos pa ug tadtad sa mga bala.

Si Jellyboy, nga saksi sa linuog nga krimen, gihimong hostage sa kampo sa militar sa Impasug-ong, Bukidnon. Tulo ka tuig na siyang gihimong ulipon sa kampo militar. Mibalibad ang mga pasistang demonyo nga buhian ang bata. Gibaharan pa nila ang mga ginikanan ni Jellyboy.

Dihang nabutyag ang krimen, gisingil sa komunidad uban sa ilang datu ang mga sundalo. Aron aregluhon ug pahilumon ang mga tawo, gipugos sa mga sundalo ang limos nga ₱5,000 sa mga paryente sa ilang mga gimasaker. Walay pakabana ang kapitan sa barangay tungod siya mismo usa ka bayarang ahente sa National Task Force-Elcac.

Gawas pa sa masaker, gisunog usab sa mga pwersa sa Special Action Forces sa PNP ug Armed Forces of the Philippines (AFP) ang eskwelahan ug tanang balay sa Sityo Canada, tulo ka adlaw human ang masaker. Naabo ang 15 ka balay sa baryo ug halos walay nabilin sa eskwelahan sa Lumad nga gitukod sa mga grupong relihiyoso ug komunidad. Gisunog usab sa mga berdugo ang mga libro, papel, ug uban pang gamit sa eskwelahan.

Wala pa nakuntento, gitumba sa mga sundalo ug pulis ang mga punuan sa mga prutas ug gihawanan ang komunidad aron makatugpa ang ilang helikopter. Kumander kaniadto sa 88th IB si Lt Col Franklin Fabic (kasamtangang koronel sa Unified Command Staff for Intelligence sa AFP WestMinCom).

Gikan 2019, dili moubos sa 22 ka kaso sa paglapas sa tawhanong-katungod ang nataho sa Ang Bayan nga direktang binuhatan sa 88th IB. Biktima sa maong mga kaso ang kapin 3,500 ka mag-uuma ug Lumad.