Wala ginluatan si Rodrigo Duterte sang murto sang iya pasismo kag krimen sa pumuluyo. Kadungan sang liwat nga pagbukas sang gawang para pasudlon ang imbestigasyon sang International Criminal Court (ICC) batuk kay Duterte kag iya guban, naggwa ang bag-o nga impormasyon bahin sa isa ka kaso sang pagmasaker sang mga Lumad sa Agusan del Sur.

Sadtong Marso 15, 2020, wala duha-duha nga ginmasaker sang mga tropa sang 88th IB ang lima ka Higaonon sa Sityo Canada, Barangay San Vicente, Esperanza, Agusan del Sur. Kabahin sa ila ang duha ka menor-de-edad. Sa pahayag sang mga himata, gindakop sang mga suldado sila ni Jellyboy Hagayhay (12), Ryan Lumista (16), Emon Hagayhay (18), Man-apyagan Lumista (19), Nieto Pasandigon (21), kag Pablo Angkamping (40) sang masugata lapit sa ila komunidad. Pakadto sila sadto sa sentro nga banwa para magbaligya sang ila mga produkto.

Gingapos ang anom kag bilog adlaw nga gintortyur sang mga pasista. Pag-abot sang gab-e ginpatay sang mga suldado ang lima. Ginbilin nga buhi ang bata nga si jellyboy. Ang bangkay sang lima ang basta na lang ginhaboy sa manabaw nga buho kag wala ginpahibalo sa pamilya ang lokasyon. Naglab-ot sa isa ka bulan bag-o nakit-an sang pamilya ang ginlubngan kag ang mga bangkay nga nakagapos pa kag tadtad sang mga bala.

Si Jellyboy, nga saksi sa makangilidlis nga krimen, ang ginhimo nga hostage sa kampo sang militar sa Impasug-ong, Bukidnon. Tatlo ka tuig siya nga gin-ulipon sa kampo militar. Nagapamalibad ang mga pasistang demonyo nga hilwayon ang bata. Ginpaandaman pa sang mga ini ang mga ginikanan ni Jellyboy.

Sang mausisaan ang krimen, upod ang ila datu, ginsukot sang komunidad ang mga suldado. Para aregluhon kag pahipuson ang mga tawo, ginpilit patulon sang mga suldado ang limos nga ₱5,000 sa mga himata sang ila mga ginmasaker. Naghipus-hipos lang ang kapitan sang barangay tungod siya mismo ang binayran nga ahente sang National Task Force-Elcac.

Magluwas pa sa masaker, ginsunog man sang mga pwersa sang Special Action Forces sang PNP kag Armed Forces of the Philippines (AFP) ang eskwelahan kag tanan nga balay sa Sityo Canada, tatlo ka adlaw pagkatapos sang masaker. Naabo ang 15 ka balay sa baryo kag halos wala sang nahabilin sa eskwelahan sang Lumad nga gintukod sang mga grupo nga relihiyoso kag komunidad. Ginsunog man sang mga berdugo ang mga libro, papel, kag iban pa nga kagamitan sa eskwelahan.

Wala pa nakuntento, ginpangtumba sang mga suldado kag pulis ang mga puno sang prutas kag ginhawanan ang komunidad para makahugpa ang ila nga helikopter. Kumander sadto sang 88th IB si Lt Col Franklin Fabic (subong koronel sang Unified Command Staff for Intelligence sang AFP WestMinCom).

Sugod 2019, indi magnubo sa 22 ka kaso sang paglapas sa tawhanon nga kinamatarung ang nalista sang Ang Bayan nga may direkta nga salabton ang 88th IB Biktima sang mga kaso nga ini ang masobra 3,500 ka mangunguma kag Lumad.