Sunud-sunod nga gianunsyo bag-o lang ang pagpakusog sa mga balangay sa Kabataang Makabayan (KM) sa pipila ka yaweng pribado ug pangpublikong unibersidad sa Metro Manila. Niadtong Nobyembre 30, naglunsad sila og lain-laing aktibidad aron saulugon ang ika-59 nga anibersaryo sa ilang organisasyon.

KM sa mga unibersidad

Gianunsyo niadtong Nobyembre 20 sa KM-Armando Mendoza ang subling pagkatukod sa ilang balangay niadtong Oktubre 10. Naglunsad sila og diskusyon mahitungod sa oryentasyon ug konstitusyon sa KM, pagparangal ug pagpasidungog sa mga martir, pagplano sa mga aktibidad ug pagpili og bag-ong komiteng tigpatuman. Nakapangalan ang balangay kang Armando Mendoza, estudyante sa University of Santo Tomas niadtong dekada 1970.

“Sa panahong dayag ang mga salaod ug hilabihang pagpaantus sa mga reaksyunaryo sa katawhang Pilipino, nagpabiling tubag sa KM ang demokratikong rebolusyon sa katawhan,” pamahayag sa balangay.

Sa Polytechnic University of the Philippines (PUP) sa Sta. Mesa, Manila, nagpahigayon og raling-pinakilab ang mga myembro sa KM-Balangay Kira Mindoro niadtong Nobyembre 29. Sa wala pa ang raling-pinakilab, naglunsad og OPOD (oplan pintal-oplan dikit) ang balangay sulod sa kampus ug gipintal ang mga panawagang “Isulong ang digmang bayan!” (Iasdang ang gubat sa katawhan!), “KM@59” ug uban pa.

Nagpahigayon usab og OPOD sulod sa kampus ang mga balangay sa KM sa University of the Philippines (UP)-Diliman ug UP-Los Baños. Gidikit usab sa KM-Eduardo Aquino sa kampus sa UP-Manila ang pag-anunsyo niini sa pagtukod sa ilang balangay niadtong Nobyembre. Nataho usab ang subling pagpakusog sa KM sa usa pa ka pribadong unibersidad ug publikong unibersidad sa Metro Manila sa ulahing katunga sa tuig.

Isyu sa kabatan-onan

Yawe ang papel sa KM sulod sa mga unibersidad ug kolehiyo aron aghaton ang mga kabatan-onan nga baktason ang dalan sa demokratikong rebolusyon sa katawhan ug iasdang ang mga pakigbisog sa masa. Sa pakighinabi sa Ang Bayan kang Rose, myembro as KM sa usa ka unibersidad sa Cavite, matud niya, nagpabilin ang mga kundisyon sulod sa ilang eskwelahan nga nagpaantus sa kabatan-onan nga sama niya. Usa kuno kini sa mga isyung mipukaw sa diwang makinasudnon sa kabatan-onan.

“Dili patas ang ginahatag nga pondo sa gubyerno alang sa batakang panginahanglan sa mga estudyante,” pamahayag ni Rose. Reklamo nila ang grabeng kakulangon sa mga klasrum ug pasilidad nga nakaapekto sa iskedyul sa klase ug kalidad sa pagtudlo.

Paantus usab kaayo sa sama niya ang mga balayrunon sa unibersidad luyo sa libreng matrikula. Kulang usab kaayo aron suportahan ang iyang edukasyon ug gasto sa pamilya ang ₱15,000 nga kita nila kada bulan. Dugang ni Rose, layo kaayo ang kahimtang sa edukasyon sa nasud sa iyang gidahum nga maayong serbisyo niini.

KM ngadto sa hukbong bayan

Ang maong mga problema ug isyu ang nagtukmod kang Ka Andrea nga biyaan ang unibersidad ug mosalmot sa Bagong Hukbong Bayan (BHB).

Saysay niya, nasaksihan niya ang walay pagtagad sa mga isyu sa kasamtangang dunot nga sistema ug gubyerno ug mga limitasyon sa pakigbisog sulod sa nagatunhay nga sistema. “Nagpabungol-bungol sila (mga upisyal sa reaksyunaryong gubyerno) sa mga lehitimong panawagan sa katawhan.” Sayod siya nga pinaagi sa armadong pagsukol makab-ot ang usa ka katilingban nga tinuod nga motubag sa mga panginahanglan sa kabatan-onan.

Ayha migunit og armas, misalmot si Ka Andrea sa pag-organisa sa KM sa han-ay sa mga kabatan-onang mag-uuma. “Bisan adunay hulga sa mga kampo militar ug pagpaniktik sa estado sa among pag-organisa, malampuson namong natukod ang balangay sa KM sa lugar, maampingon ug sekreto ang among lihok.”

Sulod sa BHB, maayo siyang kaabag sa yunit sa pagtukod sa ang-ang-munisipyo nga balangay sa KM sa natarang ginalihukan. Napasalmot nila sa maong panagtigum ang 50 ka kabatan-onan gikan sa 12 ka barangay. “Puno kaayo sa paglaum ug kadasig ang mga kabatan-onang mitambong. Unang kasinatian nako kini sa pagtukod og usa ka dakung balangay sa KM sa mas taas nga ang-ang,” matud niya.