Reklamasyon, suppiaten. Nagprotesta dagiti mangngalap ken tagasalaknib ti aglawlaw idi Enero 19 iti Department of Environment and Natural Resources idiay Quezon City tapno irupir manen ti panangpasardeng kadagiti proyekto a reklamasyon iti pagilian. Inrussuat daytoy kagiddan ti maika-5 tawen anibersaryo ti Manila Bay Rehabilitation Program.

Wayawayaan ni Mary Jane Veloso. Nagprotesta dagiti kabagian ni Mary Jane Veloso ken dagiti taga-suporta na idiay Mendiola, Manila idi Enero 10 tapno irupir iti rehimen Marcos a kiddawen iti Indonesia a wayawayaan ni Veloso iti agarup 14 tawenen a pannakaibalud. Nakapupok ni Veloso idiay Indonesia agsipud pay 2010 idi mabiktima ti human and drug trafficking. Kagiddan ti piket ti panagkasangay ni Veloso ken panagbisita ni Indonesian President Joko Widodo iti Pilipinas.

Panagikkat iti migrante a mangmangged a Pilipino idiay New Zealand, lablabanan. Nagtatabuno dagiti mangmangged ti kompanya idiay Auckland, Wellington ken Christchurch idiay New Zealand idi Enero 19 tapno gunggunen ti ELE ken ti gobyerno ti Pilipinas a sigida nga ited ti sueldo ken ayuda a maiparbeng kadakuada. Napukawan ti trabaho ti nasurok 1,000 mangmangged, karaman ti 495 mangmangged a Pilipino, idi agdeklara ti pannaka-bangkrap ti ELE Holdings Ltd idiay New Zealand, uppat nga aldaw sakbay nga agpaskua idi Disyembre 2023. Ti ELE Holdings ket grupo ti lima a kompanya nu sadinno a karaman ti dakkel nga ahensya iti panagtegged (manpower agency) mangpapa-ubra kadagiti temporaryo a migrante a mangmangged.

Isardeng ti panagminas idiay Homonhon ken Manicani. Nagirussuat manen ti rali dagiti residente ti Eastern Samar, iti panangiyuna ti Save Homonhon Movement, idi Enero 20 idiay ili ti Guiuan tapno ipasardeng ti manangdadael a panagminas kadagiti isla ti Homonhon ken Manicani. Kamaymaysa iti panagtignay dagiti relihiyoso a grupo ken dagiti parokya ti simbaan a Katoliko idiay probinsya.