Awan namati iti nabiit a deklarasyon ni Ferdinand Marcos Jr nga awanen “aktibo a larangan gerilya” ti New People’s Army (NPA) iti intero a pagilian. Naobliga uray ti Armed Forces of the Philippines (AFP) a salungasingen daytoy ken imbaga laengen a “nakakapsut” kanun ti nabatbati nga 11 larangan ti NPA. Kuna iti AFP, addaan 1,500 Nalabaga a mannakigubat “laengen” iti panagleppas ti 2023.

Agserserbi dagiti waragawag ni Marcos ken ti AFP iti panggep da a sulisugen dagiti ganggannaet a kapitalista. Parparuaren da nga awanen wenno nakapsuten ti NPA tapno ikkan dalan ti panaggamgam ti dadakkel a ganggannaet a kompanya iti daga ken nainsigudan a kinabaknang ti pagilian.

Panangibukbok ti puersa ken kuarta

Papaulbudan mismo ti bukod a tignay ti rehimen dagiti kasdiay a waragawag. Iti bangir dagiti masansan a deklarasyon ti “paradigm shift” (wenno panagbaliw ti pokus) ti AFP, dakkel a paset dagiti batalyon daytoy ket nakapakat pay laeng kadagiti teritoryo ti NPA. Awan naiyakar a puersa militar para iti sangkadagullit da nga “eksternal a panagdepensa.”

Agtaltalinaed nga addaan iti 60,000-70,000 tropa a pangkombat ti militar ken pulis (wenno 150 batalyon ti AFP ken PNP a yunit para iti kontra-insurhensya) ti nakaturong laban iti hukbo ti umili iti intero a pagilian. Adda met dita ti 50,000-pigsa a puersa paramilitar ken panangipatakder kadagiti kampo militar iti ginasut a barangay iti intero a pagilian. Nu patien ti rehimen iti ibagbaga na a “tedtedda” a Nalabaga a mannakigubat, impakat na ti 80 soldado, pulis ken paramilitar iti tunggal maysa a Nalabaga a mannakigubat.

Pinalobo met ni Marcos ti badyet ti AFP iti agarup 40% manipud P203.4 bilyon idi napalabas a tawen agturong P282.7 bilyon itatta a tawen. Karaman ditoy ti naudi-a-minuto nga insingit a ₱6.17 bilyon ti bicameral a komite ti Senado ken Kongreso. Dakkel a paset ti pondo ti militar ket mapan kadagiti jet fighter ken drone nga ar-aramaten iti maag ken dekadente a kampanya ti aerial bombing, panagkanyon ken todo-larga nga operasyon militar iti kaaw-awayan. Nangilatang met ti ₱3.18 bilyon para iti National Task Force-Elcac.

Iti aktwal, agtultuloy ken awan-ressat dagiti focused military operation a manggasgastar ti nagdakkelan a pondo iti adu a rehiyon iti pagilian. Idiay Southern Mindanao, nakapakat pay latta ti 19 a batalyon iti uneg ti kontrol ti 10th ID iti bangir ti maysa tawenen a deklarasyon nga “insurgency-free” ti rehiyon. Pagtaltalinaeden met ken ponpondoan ti rehimen ti addaan 400 detatsment ti CAFGU, ken 13 puersa a paramilitar iti rehiyon.

Idiay Eastern Visayas, inwaragawag mismo ti 8th ID nga agtultuloy na a patignayen ti 14 batalyon (wenno katukad a 5,600 suldado) iti intero a rehiyon tapno “kamaten” ti tedtedda kano a 119 Nalabaga a mannakigubat kadagiti probinsya ditoy. Imbaga met ti kumander ti dibisyon nga aramaten na amin nga armas militar tapno “ibusenen” ti hukbo ti umili.

Idiay Cagayan Valley, nangipatulod ti 100 barbaro a soldado ti 5th ID idi laeng Enero 16 tapno “naan-anay a parmeken ti insurhensya iti sibubukel a saksakupen ti dibisyon.” Kasinnupadi daytoy iti panangilastog ti kumander ti 5th ID idi Disyembre 2023 nga “awanen kabaelan” nga agirussuat ti pulitiko-militar a trabaho ti hukbo ti umili iti rehiyon ken tantannawagan dan ti “naan-anay a balligi” laban iti NPA ita umuna a paset ti tawen.

Nainkalintegan a pannakidangadang

Iti aktwal, agtigtignay ti NPA iti 14 pangrehiyon a kumand na nga addaan bukbukod a tartariwedwedan a larangan gerilya.

Adayo iti pannakaparmek ti Nalabaga a hukbo iti bangir dagiti napadasan na a panagsanud kadagiti naglabas a tawen, a resulta dagiti panguneg a kakapuyan. Gapu ta nainkalintegan ti pannakidangadang ken ibagbagi ti NPA ti kalikagum dagiti mannalon ken mangmangged a mangbukbukel iti nalawa a mayorya ti umili a Pilipino, sigurado nga agtultuloy daytoy a makaartap ken umabante.

Agtultuloy nga agisaysayangkat ti NPA kadagiti gerilya a maniobra tapno buongen ti panagsalikawkaw ti AFP, agtultuloy a mangbukel ti nalawlawa a baseng masa ken palawaen dagiti larangan gerilya daytoy. Agtultuloy daytoy nga agirussuat kadagiti taktikal nga opensiba tapno patiruan dagiti nakakapuy a paset ti kabusor nu sadinno ida a naan-anay a makillaat.

Siguraduen ti NPA nga abaken na ni Marcos, kayarigan nu kasano nga inabak daytoy ti ama na ken amin a suportado-ti-US a gobyerno iti naglabas a 35 tawen nga amin ket nangilastog a rebbeken ti NPA. Iti uneg ti tarabay ti Partido, nakasursuro ti NPA kadagiti adal ken determinado a paayen dagiti brutal nga opensiba ti AFP.