Nagmartsa-karaban manen idi Enero 16 idiay Manila ti rinib-ribu a drayber, opereytor ken dagiti pamilya da tapno salakniban ti pagbiagan da iti panagpasada ken isubli ti 5-tawen a prangkisa da. Naggu-ummong da idiay Quezon City sakbay a nagkaraban agturong Mendiola idiay Manila ngem sinaed ida dagiti pulis nga inunor ti España, Manila. Ditoy dan a nagirussuat ti programa aginggana kabigatan na ti parbangon.

Sakbay na, nagpiket da iti House of Representatives idiay Quezon City idi Enero 10 kagiddan ti naiyaramid a panagdengngeg ti komite iti transportasyon kasilpo ti kiddaw nga ibasura ti peke a modernisasyon ti rehimen a US-Marcos.

Iti makuna a panagdengngeg, inggisa dagiti makabayan a kongresista dagiti upisyal ti Land Transportation Franchising and Regulatory Board (LTFRB) a nangipatangken iti puersaran a konsolidasyon dagiti prangkisa. Limtuad ditoy a dakkel a bilang pay dagiti dyipni ti saan a nagkonsolida, maikaniwas iti waragawag ti ahensya. Adu met dagiti ruta ti saan pay a naurnos, a rekisito iti konsolidasyon.

Iti Senado ken Kongreso, limtuad ti kiddaw nga isuspinde ti puersaran a konsolidasyon aginggana’t saan pay a maresolba dagiti adu a bambanag nga insango dagiti drayber ken opereytor. Adda met dagiti kiddaw nga imbestigaran dagiti limtuad nga alegasyon ti korapsyon dagiti upisyal ti LTFRB a nakikumplot iti sigud a rehimen Duterte iti panaggatang kadagiti binukel a ganggannaet a “moderno a lugan” nga isukat kadagiti tradisyunal a dyip, nga addaan paset a lokal nga imanmanupaktura.

Kabayatan na, nagprotesta dagiti agtutubo iti opisina ti Asian Development Bank (ADB) iti Ortigas Center idiay Mandaluyong City idi Enero 19 tapno kundenaren ti papel na iti peke a modernisasyon iti transportasyon. Ti ahensya ket agilaklako ti imported a “moderno a dyip” iti linged iti panangrissut iti “climate change.” Idi Enero 19, daytoy a panagrasrason met ti inusar ti Office of the Solicitor General kas sungbat iti petisyon ti Piston laban iti puersaran a konsolidasyon dagiti indibidual a prangkisa.