Agsasaruno dagiti pammapatay, gandat a pammapatay, pananglipit ken dadduma pay a panaglabsing iti karbengan-tao idiay isla ti Negros ti insayangkat dagiti yunit ti 62nd IB kadagiti naglabas a lawas.

Pinidut ket tinortyur sakbay a pinatay dagiti soldado ti dua a sibilyan idiay Barangay Sag-ang, La Castellana, Negros Occidental idi Enero 17 ti bigat. Tapno kalluban ti nakaam-ames a krimen da, parparuaren dagiti soldado a napapatay iti modus daytoy a peke nga engkuentro da Boy Baloy, 60 anyos, ken Bernard Torres, 50.

Da Baloy ken Torres ket pinidut iti pagnanaedan da a balay, inyadayo iti komunidad, impauneg iti nairteng nga imbestigasyon, binugbog ken tinortyur, sakbay a pinaltugan dagiti berdugo. Ni Baloy ket kameng ti Kaisahan sa Gamay’ng Mag-uuma sa Oriental Negros (KAUGMAON-Guihulngan Chapter), kabayatan a ni Torres ket maysa a drayber ti habal-habal ken kameng ti Undoc-Piston-Guihulngan Chapter. Agsipud pay 2017, masansanen nga agsagsagrap ti pananglipit ken panang-haras ti dua manipud kadagiti puersa ken ahente ti estado.

Saan a Nalabaga a mannakigubat dagiti dua, segun met laeng iti New People’s Army (NPA)-Central Negros.

Gandat a pammapatay. Pinaltu-paltogan dagiti soldado ti agguunas a ni Cerilo Bagnoran Jr bayat a nakalugan iti motorsiklo na ken agbibiahe idiay Crossing Cordova, Barangay Manghanoy, La Castellana idi Enero 14. Paawid ni Bagnora idi sinada isuna ti tallo nga elemento ti 62nd IB Charlie Company idiay Crossing Cordova ken patuduan ti bala.

Sakbay ti gandat a pammapatay kenkuana, ni Bagnoran ket sinapulen dagiti nagpakaammo a pulis idi Enero 7 iti baryo na. Idi Enero 8, sinapsapul isuna ti 24 soldado ti 62nd IB nga idi ket agop-operasyon idiay Sityo Mandayao-4, Barangay Kamandag, La Castellana.

Pananglipit. Saan a nakalasat iti brutalidad ken terorismo ti estado ti pamilya Carreon idiay Sityo Bonbon, Barangay Hinakpan, Guihulngan City. Ingkapilitan a sinerrek ken rinansak ti addaan 40 tropa ti 62nd IB ti balay ti pamilya idi Enero 14 ti bigat. Labsing iti linteg a sinukimat dagiti soldado ti aramaten ti pamilya ken sapsapulen ni Bimbo Carreon, ti makinkukua ti balay. Nangipagteng ti buteng iti pamilya, aglalo kadagiti ubbing, ti atake militar.

Kabayatan na idiay Cavite, nakasagrap ti pammutbuteng dagiti mannalon ti Lupang Ramos sa Dasmariñas idi Enero 15. Sinerrek ti lima nga elemento ti Philippine Army Scout Ranger a nakalugan iti maysa a trak ti militar ti makuna a komunidad ken kinasaan ti paltog dagiti residente. Ilablaban dagiti mannalon ditoy ti karbengan iti 372 ektarya ti daga agsipud pay 2014.