Kinundenar ti International Coalition for Human Rights in the Philippines (ICHRP) ken Friends of the Filipino People in Struggle ti panagbombomba ti Armed Forces of the Philippines iti maysa a kampo ti New People’s Army (NPA) idiay Malaybalay City idi Disyembre 25, 2023. Kuna dagiti grupo, labsing iti internasyunal a makatao a linteg (IHL) ti panagbombomba a nagaramat ti sursurok wenno saan a kabatog a pigsa laban iti bassit ken nakakapuy nga istruktura dagiti kampo ti NPA.

Kunada, “likas nga indiscriminate” wenno awan pilpilien, mangmangted-peggad iti biag ken pagbiagan dagiti sibilyan ken mangipagpagteng ti nalawa a pannakaperdi iti aglawlaw ti kasdiay a klase ti panagbomba. Pinerdi daytoy ti kappia, nangipagteng ti nasaknap a buteng, panic ken troma kadagiti residente kadagiti kaasideg a komunidad ken dadaelen ti kabakiran a pangal-alaan da ti makan ken pagbiagan. Nangipagteng met ti saan a kasapulan ken sursurok a didigra ken panagsagaba ti sursurok a puersa nga inaramat laban kadagiti Nalabaga a mannakigubat.

Kabayatan na, 14 a grupo dagiti agtutubo manipud Pilipinas, India, Myanmar, Palestine, West Papua, US ken Canada ti nagkaykaysa tapno ikiddaw ti panangisardeng kadagiti panagbombomba idiay Palestine, India, Myanmar ken Pilipinas. Kunada, ar-aramaten dagiti imperyalista ken dagiti kakumplot da ti awan aniaman a panagbombomba, istraping ken panagkanyon laban kadagiti sibilyan iti linged ti “panangparmek” kadagiti armado a tignayan nga agraraira kadagiti nadakamat a pagilian.

Kinundenar ti agtutubo ti panangpatay iti nasuroken 24,000 a Palestino idiay Gaza ti panagbomba ti Zionista nga Israel. Nasurok 70% kadagiti biktima ket babbai, ubbing ken tinedyer. Tinubngar met dagitoy dagiti aerial drone attack idiay Bastar, Chhattisgarh ken Telengana idiay India ken ti agtultuloy a kampanya a panagbomba ti rehimen Marcos iti Pilipinas. Idiay Myanmar, kinundenar dagiti grupo ti saan a bumaba iti 643 airstrike nga inrussuat ti hunta militar nga immagaw iti estado poder agsipud 2021.