Pinatay dagiti puersa ti reaksyonaryo nga estado ti India ti maysa a 6-bulan a maladaga idiay Mutvendi, distrito ti Bijapur, estado ti Chattisgarh idi Enero 1. Parparuaren dagiti puersa ti estado nga adda “engkuentro” kadagiti gerilya a Maoista idi napapatay ti ubing, banag a papaulbudan dagiti residente.

Segun iti waragawag dagiti nakaimatang, agpaspasuso ni Massi Vadde iti 6-bulan a maladaga na idi killaat a pimmaltog dagiti puersa a pangseguridad ti India iti nabakir a paset ti Mutvendi. Simmalpot iti ima ni Massi Vadde ti bala a naipunta ken pimmatay idi maladaga na.

Inlawag met ti Communist Party of India (Maoist) West Bastar Division nga awan napasamak nga engkuentro kadaydiay nga aldaw. Segun iti kalihim ti dibisyon ti CPI (Maoist) a ni Mohan, inatake ti komunidad gapu iti panagsupiat da iti militarisasyon ken panaglaban iti panangagum dagiti korporasyon iti daga da.

Dagiti pulis ket naggapu iti Kavadgaon (asideg idiay Mutvandi). Maysa daytoy iti tallo a baro a naipatakder a kampo dagiti pulis iti distrito ti Bijapur idi Disyembre 2023.

Ti terorista a panagatake dagiti puersa ti estado kadagiti Indian, partikular kadagiti Adivasi wenno katutubo idiay India, ket paset ti irusrussuat nga Operation SAMADHAN-Prahar, kontra-insurhensya a kampanya ti India. Rinugian daytoy nga impatungpal idi 2017 tapno rebbeken ti CPI (Maoist) ken armado a puersa daytoy, nga ar-aramaten tapno tiruen ti saan nga armado a pannakidangadang ti umili ti India.

Iti turay daytoy iti naglabas a lima tawen, nagipatakder ti estado ti saan a bumaba iti 195 kampo paramilitar. Dagitoy a kampo ket kinnumplot iti nagbaetan dagiti dadakkel a korporasyon ken ti pasista a rehimen tapno patakyasen ken parmeken ti demokratiko a panaglaban dagiti Adivasi ken umili nga Indian.

Kasilpo na, nagprotesta dagiti agtutubo nga Indian ken dagiti mannuro ti Delhi University iti kampus na idiay Delhi, India idi Enero 10 tapno kundenaren ken ipabasura ti Operation SAMADHAN-Prahar.