Molahutay ang Bagong Hukbong Bayan batok sa rehimeng US-Marcos
Walay nagtoo sa bag-ohay nga deklarasyon ni Ferdinand Marcos Jr nga wala nay “aktibong natarang gerilya” ang Bagong Hukbong Bayan (BHB) sa tibuok nasud. Naobliga bisan ang Armed Forces of the Philippines (AFP) nga supakon kini ug giingon na lang nga “huyang” ang nahabiling 11 ka nataran sa BHB. Matud sa AFP, 1,500 na lamang ka Pulang manggugubat ang nabilin sa katapusan sa 2023.
Nagsilbi ang mga pamahayag ni Marcos ug sa AFP sa tinguha nilang agnihon ang mga langyawng kapitalista. Gipagawas nilang wala o huyang na ang BHB para hatagag dalan ang pagpangawkaw sa dagkung langyawng kumpanya sa yuta ug natural nga bahandi sa nasud.
Pagbubu og pwersa ug kwarta
Ginapanghimakak mismo sa kaugalingong lihok sa rehimen ang maong mga pamahayag. Luyo sa balik-balik nga mga deklarasyon sa “paradigm shift” (o pag-usab sa pokus) sa AFP, dakung bahin sa mga batalyon niini ang nakadeploy pa gihapon sa mga teritoryo sa BHB. Walay gibalhin nga pwersang militar alang sa gipanghinambog nilang “eksternal nga depensa.”
Nagpabiling anaa sa 60,000-70,000 ka tropang pangkombat sa militar ug pulis (o 150 ka batalyon sa AFP ug PNP nga mga yunit para sa kontra-insurhensiya) ang nakapukos batok sa hukbong bayan sa tibuok nasud. Aduna usay 50,000 ka pwersang paramilitar ug pagtukod og mga kampo militar sa gatusan ka barangay sa tibuok nasud. Kung toohan ang rehimen sa ginasulti niining “nahabiling” Pulang manggugubat, ang matag usa ka Pulang manggugubat moatbang sa 80 ka sundalo, pulis ug paramilitar.
Gipadaku usab ni Marcos ang badyet sa AFP og halos 40% gikan ₱203.4 bilyon niadtong milabayng tuig ngadto sa ₱282.7 bilyon karong tuiga. Lakip dinhi ang ulahing-minutong gisal-ut nga ₱6.17 bilyon sa bicameral nga komite sa senado ug kongreso. Dakung bahin sa pondo sa militar mapadulong sa mga jet fighter ug drone nga ginagamit sa hungog ug dekadenteng kampanya sa aerial bombing, pagpanganyon ug todo-largang operasyong militar sa kabanikanhan. Naggahin usab og ₱3.18 bilyon alang sa National Task Force-Elcac.
Sa aktwal, makanunayon ug walay sal-ang ang mga focused military operation nga nag-usik-usik sa labing dakung pondo sa daghang rehiyon sa nasud. Sa Southern Mindanao, nakadeploy pa gihapon ang 19 ka batalyon ilalum sa kontrol sa 10th ID luyo sa kapin usa ka tuig na nga deklarasyon nga “insurgency-free” na ang rehiyon. Gipabilin usab ug ginapondohan sa rehimen ang 400 ka detatsment sa CAFGU, ug 13 ka pwersang paramilitar sa rehiyon.
Sa Eastern Visayas, gipamahayag mismo sa 8th ID nga padayon niining palihukon ang 14 ka batalyon (o tugbang sa 5,600 ka sundalo) sa tibuok rehiyon aron “gukdon” ang kuno nahabiling 119 ka Pulang manggugubat sa mga prubinsya. Giingon usab sa kumander sa dibisyon nga pagagamiton niini ang tanang armas militar aron “hutdon” na ang hukbong bayan.
Sa Cagayan Valley, nagpadala og 100 ka bag-ong sundalo ang 5th ID kaniadto lang Enero 16 aron “hingpit nga pukanon ang insurhensiya sa tibuok langkub sa dibisyon.” Sukwahi kini sa pagpanghinambog sa kumander sa 5th ID niadtong Disyembre 2023 nga “wala nay katakus” nga maglunsad og gimbuhatong pulitiko-militar ang hukbong bayan sa rehiyon ug makita na nila ang “hingpit nga kadaugan” batok sa BHB karong unang bahin sa tuig.
Makatarunganong pagsukol
Sa aktwal, nagalihok ang BHB sa 14 ka pangrehiyong kumand niini nga adunay nagkadaiyang ginadumalahan nga mga natarang gerilya.
Layo sa pagkapuo ang Pulang hukbo taliwala sa nasinati niining mga pag-atras sa milabayng mga tuig, nga bunga sa mga pangsulod nga kahuyangan. Tungod kay makatarunganon ang pagsukol ug ginarepresentahan sa BHB ang pangandoy sa mga mag-uuma ug mamumuo nga naglangkub sa lapad nga mayorya sa katawhang Pilipino, siguradong padayon kining makalahutay ug moabante.
Padayon nga nagapahigayon ang BHB og mga maniobrang gerilya aron makaluwas sa pagliyok sa AFP, kanunay nga nagatukod og mas lapad nga baseng masa ug nagpalapad sa mga natarang gerilya niini. Padayon kining maglunsad og taktikal nga mga opensiba aron ig-on ang huyang nga mga bahin sa kaaway kung asa wala nila damha.
Siguruhon sa BHB nga malabwan niini si Marcos, sama kung paunsa kini nakalahutay sa iyang diktador nga amahan ug tanang mga suportado-sa-US nga mga gubyerno sa milabayng 35 ka tuig. Silang tanan nanghinambog nga pukanon ang BHB. Sa giya sa Partido, nagkat-on ang BHB sa mga pagtulun-an ug determinadong pakyason ang brutal nga mga opensiba sa AFP.