Inambus ti maysa a yunit ti New People’s Army (NPA)-Rizal ti agop-operasyon a tropa ti 80th IB idiay Lukatang Malaki, Barangay San Isidro, Rodriguez, Rizal idi Enero 31, alas-5:10 ti parbangon. Maysa a soldado ti pimmusay, bayat a dua pay ti nasugatan. Ti nakuna a yunit ket parabantay iti manangdadael a proyekto a Wawa-Violago Dam idiay Rizal.

Segun iti ulat, agmaysa tawenen ti nasagedsed ken awan-ressat a focused military operation ti 80th IB idiay Rodriguez. Laksid iti panagbalin a parabantay iti maar-aramid a dam, protektor met laeng ti yunit iti interes ti Lukatang Malaki iti agturturay a dadakkel nga agom ti daga a da Araneta, Villar ken Robles.

Maseknan ti yunit kadagiti agtutuon a panaglabsing iti karbengan-tao karaman ti iligal a panangibalod kadagiti katutubo ken mannalon a mangsalsalaknib kadagiti karbengan ken pagbiagan da. Manipud Enero 31, pinakaro ken pinairot ti 80th IB ti panagbantay iti panagruar-serrek dagiti residente iti komunidad. Nangibangon ti tsekpoynt dagiti soldado ken agbalay-balay da tapno kigtuten dagiti residente ken ipauneg ida iti iligal nga interogasyon.