Duan nga eksperto ti United Nations (UN) ti nangirekomendar ti panangburak ti National Task Force-Elcac gapu iti didigra nga ipagpagteng daytoy kadagiti karbengan ti umili a Pilipino. Idi Pebrero 2, inrekomendar daytoy ni Irene Khan, UN Special Rapporteur para iti nawaya a panagsao ken opinyon, kalpasan ti 10-aldaw nga imbestigasyon na iti Pilipinas.

Sakbay isuna, inrekomendar met ni Ian Fry, UN Special Rapporteur para iti panangitantudo ken panangsalaknib ti karbengan-tao iti konteksto ti climate change ken ti panangburak iti ahensya idi Nobyembre 2023. Kas kenni Khan, nakimiting ni Fry iti naduma-duma a demokratiko a sektor iti pagilian.

Iti paset ni Khan, inikkan na ti atensyon dagiti aramid a makaapekto iti nawaya a panagsao kas iti red-tagging, harasment ken panangliplipit usar dagiti linteg. Iti panagsao na, inrekomenda na ti panangburak iti NTF-Elcac a kunana ket “nagpasaren” ken “tagaduron” ti Red-tagging. Inrekomenda met ni Khan ti panag-“unblock” wenno panangikkat iti restriksyon kadagiti progresibo a website nga impatungpal ti reaksyonaryo nga estado.

Dagitoy a rekomendasyon ket manipud iti pannakidayalogo ni Khan iti naduma-duma a grupo ti midya ken dadduma pay a demokratiko a sektor, ken uray kadagiti opisyal ken armado a puersa ti estado. Sinangaili na met iti pagbaludan idiay Tacloban City ti nakabalud a dyornalis iti independyente a midya nga Eastern Vista a ni Frenchie May Cumpio ken dua pay a kadua na.

Laksid idiay Manila ken Tacloban, napan ni Khan kadagiti syudad ti Baguio, Cebu, ken Davao. Sinabat isuna ditoy dagiti demokratiko nga organisasyon. Nagirussuat da kadagiti piket ken dagiti talakayan kasilpo ti panagsangpet ni Khan iti Pilipinas.

Immannamong dagiti grupo ti dyornalis, artista ken tagasalaknib ti karbengan-tao kadagiti rekomendasyon ni Khan. Naragsakan da met iti posisyon ni Khan iti Cybercrime Prevention Act a nakuna da a manglaplapped iti wayawaya iti panagsao, aglalo dagiti probisyon na iti cyberlibel.