Naiduron ti sangsangkamaysa a panagtignay dagiti drayber ken opereytor, iti panangidaulo ti Pagkakaisa ng mga Samahan ng Tsuper at Operator Nationwide (Piston), Samahang Manibela Mananakay at Nagka-Isang Terminal ng Tarnsportasyon (Manibela), ken Tanggol Pasada Network, ti rehimen a US-Marcos nga isanud manen ti dedlayn ti inkapilitan a konsolidasyon ti prangkisa dagiti public utility vehicle (PUV) idi agtapos ti Enero. Paset ti inkapilitan a konsolidasyon ti ubbaw a PUV Modernization Program (PUVMP) ti gobyerno. Insanud ti rehimen ti dedlayn agturong Abril 30 manipud iti sigud a Disyembre 31, 2023 nga immuna a pinawaywayan agturong Enero 31.

Impablaak ti panangisanud ti dedlayn kalpasan ti maikadua a panagdengngeg ti komite iti transportasyon iti Kongreso idi Enero 24, a nangtalakay iti kina-inutil ken kinapalpak ti PUVMP. Aginggana iti agdama, dakkel a bilang pay dagiti drayber ken opereytoy ti dyip ti nagkedked nga agpakonsolida, maikaniwas iti waragawag ti rehimen. Adu pay dagiti ruta ti awanan konsolidado a prangkisa.

Itudtuding dagiti grupo ti panangiyatras ti dedlayn kas balligi ti sangsangkamaysa a panagtignay da. Nupaykasta, agtultuloy da nga irupir nga ibasura ti sibubukel nga iskema ti inkapilitan a konsolidasyon ken PUVMP. Kunada, usaren da daytoy a pagbatayan para iti lalo a dadakkel a panagtignay laban iti programa.

Tinalakay met iti maikatlo a panagdengngeg idi Enero 31 ti isyu ti inkapilitan a konsolidasyon a segun iti sumagmamano a kongresista ket maituding a saan a konstitusyonal ken labsing iti karbengan dagiti drayber ken opereytor. Kabayatan na, nagprotesta met ti dua a grupo iti Korte Suprema idiay Manila idi Enero 23 tapno kiddawen ti panangayon kadakuada ti korte kasilpo ti indasar da a petisyon tapno ipasardeng ti inkapilitan a konsolidasyon ti prangkisa ken ti PUVMP. Inrana da ti protesta bayat nga adda iti sesyon amin a mahistrado.