Maikaniwas iti lablabiden na a “panaglisi” iti nasaklaw nga armado a risiris idiay Middle East, palpalawaen ti US ti imperyalista a gerra na iti rehiyon. Katinnulong ti United Kingdom, agarup inaldaw na a patudtuduan dagiti pwersa nga Houthi idiay North Yemen manipud Enero 12.

Ibagbaga ti US a bales nga aksyon dagitoy laban iti panangatake dagiti Houthi kadagiti bapor nga Israeli ken Amerikano a dumaldalan iti kaasideg iti teritoryo na idiay Red Sea. Ti aksyon dagiti Houthi ket panangsuporta iti pannakidangadang ti Palestine laban iti henosidyo ti Zionista nga Israel idiay Gaza. Dagiti Houthi ket agirusrussuat ti bukod nga armado a pannakidangadang laban iti reaksyonaryo nga estado ti Yemen a suportado agpada ti Saudi Arabia ken US.

Idi met Pebrero 2, nagpatudo ti US kadagiti bomba iti 85 lokasyon idiay Iraq ken Syria, kas sungbat iti panagatake iti Tower 22, maysa a sikreto a base militar idiay Jordan asideg iti murdong idiay Syria, idi agtapos ti Enero. Tallo nga Amerikano a soldado ti natay ken 34 ti nasugatan iti panagatake. Kapada idiay Yemen, inyaramid ti panagatake iti pasilidad militar ti US kas panangsuporta iti armado a panaglaban dagiti Palestino idiay Gaza. Nasurok 27,000 ti natayen idiay Gaza, nu sadinno 11,500 ket ubbing, ken 66,630 ti nasugatan, kadagiti panagbomba ti Zionista nga Israel manipod pay Oktubre 7, 2023.

Dagiti panagbomba ti US, kagiddan ti awan patingga a panagpangpangta na iti umili ti Middle East, ket pammaneknek iti pannakaigamer ti rehimen a Biden iti gerra tapno salakniban ken patibkeren ti hegemonya na iti naduma-duma a paset ti lubong. Kagiddan iti panangpataray kadagiti risiris idiay Middle East, paat-atiddogen na ti kampanya nga henosidyo ti Israel idiay Palestine babaen iti panangsada kadagiti addangen para iti sardeng-putukan ken agtultuloy a panangibukbok ti ayuda ken armas iti Zionista a rehimen. Laksid ditoy, paak-akabaen met ti US ti 2-tawenen a gerra a proxy na laban iti Russia idiay Ukraine, iti pannakadidigra ti umili nga Ukrainian. Instrumento dagitoy a gerra para iti panangkurimes ti minilyon a superganansya dagiti Amerikano a kompanya iti armas.