Reporma iti daga, inrupir dagiti mannalon idiay Bacolod City. Indauloan ti Kilusang Magbubukid ng Pilipinas (KMP)-Negros ken National Federation of Sugar Workers (NFSW) ti dua aldaw nga aktibidad dagiti mannalon idiay Bacolod City idi Enero 23-24 tapno irupir ti karbengan da iti daga.

Idi Enero 23, nagpiket-dayalogo da iti Provincial Agrarian Reform Office I iti syudad kasilpo dagiti isyu iti 37 asyenda idiay Negros Island. Kabigatan na, nagmartsa da iti sentro ti syudad tapno lagipen ti maika-37 anibersaryo ti Mendiola Massacre ken tubngaren ti idurduron a charter change ti rehimen Marcos.

125 tawen ti gerra a Pilipino-Amerikano, linagip. Linagip dagiti grupo a nailian-demokratiko babaen iti protesta iti sango ti embahada ti US idi Pebrero 4 ti maika-125 tawen nga anibersaryo ti panagrugi ti gerra a Pilipino-Amerikano a pimmatay ti ginasot-ribu a Pilipino. Tinalmegan dagiti grupo ti agtultuloy a panangsakop ti US iti pagilian, iti langa ti permanente a presensya militar na iti Pilipinas. Tinubngar daytoy ti US kadagiti imperyalista a gerra na, ken panangpondo iti henosidyo ti Israel idiay Palestine.

First-day Rage inyaramid iti naduma-duma a kampus ti UP. Sinabat dagiti estudyante ti University of the Philippines (UP) ti umuna nga aldaw ti klase iti protesta iti naduma-duma a kampus na iti pagilian. Pinalatak da kadagiti protesta ti isyu kanaig ti pang-akademiko a wayawaya, panangikuspil iti agtutubo, pananglaban iti charter change ken dadduma pay nga isyu pangkagimongan. Nagirussuat dagiti estudyante iti UP-Cebu idi Enero 23; iti UP-Manila, UP-Visayas ken UP-Tacloban idi Enero 29; iti UP-Los Baños idi Pebrero 5; ken iti UP-Diliman idi Pebrero 6.

Panagngato ti matrikula iti DLSU, sinupiat. Nasurok 100 estudyante ti De La Salle University (DLSU)-Manila ti nagprotesta iti uneg ti kampus na idiay Taft Avenue, Malate, Manila idi Enero 31 tapno ipaduyakyak ti panagsuppiat da iti panagngato ti matrikula iti sumaruno a panagseserrek. Nagmartsa met dagiti estudyante iti kampus ti DLSU-Laguna kadaydiay nga aldaw. Agpada nga indauloan ti panagtignay dagiti konseho ti estudyante. Kiddaw da nga agipatungpal ti “tuition freeze” iti sango ti pangta a 9.21% panagngato iti matrikula.

Presyo ti langis, ibaba. Nagirussuat ti protesta dagiti drayber ken opereytor ti dyip iti sango ti Shell Gasoline Station idiay Caretta, Cebu City idi Enero 30 tapno kundenaren ti panagngato manen ti presyo ti langis. Nagsasaruno iti naglabas a lawas ti nagbalin a panagngato iti presyo ti langis.

Atin ang Pinas, China layas! Nagprotesta dagiti mangngalap ken progresibo a grupo iti Chinese Consulate idiay Makati City idi Pebrero 6 tapno tubngaren ti agtultuloy a pannakibiang ti China idiay West Philippine Sea. Indauloan ti panagtignay ti Pambansang Lakas ng Kilusang Mamamalakaya ng Pilipinas (Pamalakaya).