Awanan patingga na a sinuspindir ti Commission on Elections idi Enero 29 ti proseso ti panangawat kadagiti pirma nga inyaramid ti People’s Initiative for Reform Modernization and Action (Pirma) para iti charter change (chacha) wenno panangbaliw iti Konstitusyon 1987. Maikaniwas daytoy iti immuna a waragawag ti komisyon a “paraawat” laeng daytoy kadagiti pirma. Pambar na, masapol nga irebyu pay dagiti pagannurotan a mangtartarawidwid iti kasdiay nga inisyatiba.

Nupaykasta, inaklon nan ti pito milyon a pirma a nagpartak a naurnong manipud iti 209 distrito. Segun kadagiti allagaden ti people’s initiative, kasapulan laeng ti 11.4 milyon pirma wenno 12% iti 91.9 milyon rehistrado a botante tapno maiduron ti makuna a panggep.

Napasardeng ti panagurnong iti sango ti nalawa a panagsupiat ditoy ti naduma-duma a sektor. Rugi pay laeng, naduktalanen ti panagaramat ti pampubliko a pondo para iti panagurnong ti pirma. Nagsaknap ti damag ti panagpapirma kasukat ti ₱100 wenno nakarkaro, ayuda manipud iti naduma-duma nga ahensya ti estado.

Iti maysa a panagdengngeg iti Senado idi Enero 30, naduktalan ti kinnumplot ti Pirma, ti grupo a nangbayad ti patalastas tapno iduron ti chacha, ken ni House Speaker Martin Romualdez ken dadduma pay a kongresista, para iti panagurnong ti pirma. Natiliw iti ngiwat ti ima ni Ferdinand Marcos Jr iti panggep a pirma idi imbagana na nga agsapsapulen isuna ti “sabali a pagpilyan” tapno maiduron latta ti chacha.

Iti sango ti suspensyon, agtultuloy ti kampanya nga “ibabawi-pirma” a rinugian ti Bayan Muna idi Enero 28. Adun ti pimmirma ti nangibaga ti pagayatan nga ibabawi dagiti pirma da idi maammoan da a para gayam daytoy iti chacha. Kunada, nu saan a panangpapirma para iti ayuda, sabali a rason ti naibaga kadakuada isu a pimmirma da.

Itatta, agtultuloy a palpalawaen dagiti demokratiko a grupo ti panagsupiat iti chacha. Daytoy ket iti sango ti gandat ti rehimen Marcos a papartaken iti Senado ti Resolution of Both Houses No. 6 a nakaturong iti panangbaliw kadagiti probisyon maipanggep iti ekonomya. Natalmeg daytoy a supsuppiaten dagiti grupo gapu ta mangted-dalan daytoy iti sibubukel a panagtagikua dagiti ganggannaet kadagiti negosyo, rekurso ken daga a Pilipino.

Idi Enero 21, nagprotesta dagiti grupo a nailian-demokratiko iti sango ti Kongreso tapno tubngaren ti chacha. Inggiddan daytoy iti umuna nga aldaw ti sesyon ti Kongreso. Nagprotesta da met iti Senado idi Pebrero 5, kagiddan ti umuna a panangdengngeg ditoy iti RBH 6.

Idiay Davao City, tinubngar dagiti progresibo a grupo ti panagirussuat ti “grand rally” ti pamilya Duterte a kano ket kontrachacha. Kunada, “awan kredibilidad” aglalo ni Rodrigo Duterte, nga idi nakatugaw pay kas presidente ket nangitandudo met ti kapada a gandat.