Saan a bumaba iti 35 elemento ti Central Armed Police Force (CAPF) ken espesyal a yunit a COBRA (Combat Battalion for Resolute Action) ti reaksyonaryo nga estado ti India ti natay iti reyd ti People’s Liberation Guerilla Army (PLGA) iti kampo idiay Darmavaram idi Enero 16. Ti Darmavaram ket maysa a komunidad idiay Pamed, Bijapur idiay rehiyon ti Chhattisgarh. Laksid ditoy, 40 pay a pulis ti grabe a nasugatan iti panagraut. Inrussuat ti PLGA ti reyd tapno dupraken ti pasista nga Operation Kagar idiay Central India.

Iti report, nangrugi ti reyd iti alas-7:05 ti rabii. Nagaramat ti PLGA ti nasurok 600 granada ken dadduma pay a bukod nga aramid a pabittak iti tallo oras a reyd. Sakbay ti mismo panagatake iti kampo, kinontrolen dagiti Nalabaga a gerilya dagiti aglawlaw a lugar. Binarikadaan da dagiti tulbek a dalan aramat ti dadakkel a troso ken pinatignay ti milisya tapno pabittakan dagiti agresponde a yunit ti pulis. Nagmartir iti reyd ti tallo a mannakigubat.

Kasaruno na, inatake idi Pebrero 1 ti PLGA ti konstruksyon ti maysa a rangtay idiay Abujhmaad, idiay distrito ti Narayanpur, Chhattisgarh. Pinaralisa dagiti gerilya ti maysa a traktora, maysa a tanker ken concrete mixer. Ti panangitakder ti rangtay, kas iti dadduma pay a “proyekto a pampadur-as” idiay Abujhmaad, ket panangited-dalan iti panagserrek ti dadakkel a korporasyon a manggamgam iti nainsigudan a kinabaknang ti lugar.

Kuna iti Communist Party of India (CPI)-Maoist, daytoy nga opensiba ket paset ti panangsalaknib da iti umili nga Adivasi (katutubo). Nakuna na, panangited-hustisya daytoy iti panangikuspil dagiti pulis laban iti rebolusyonaryo nga umili.

Terorismo ti Operation Kagar

Rinugianan nga impatungpal ti Operation Kagar idi Enero idiay Abujhmaad, maysa a bambantay ken bakbakir a rehiyon idiay abagatan nga estado ti Chhattisgarh. Paset daytoy ti pinalawa a panangipatungpal iti kontra-insurhensya a kampanya nga Operation SAMADHAN-Prahar (OSP) ti reaksyonaryo nga estado nga Indian nga idadauloan ni Narendra Modi.

Patpatignayen iti uneg ti operasyon ti 10,000 pwersa a paramilitar a nakapakat iti lugar. Ti 3,000 ditoy ket manipud pay iti dadduma nga estado ti India nga imbukbok idiay Abujhmaad tapno pokusan ti panangparmek iti armado a panaglaban nga idadauloan ti CPI-Maoist. Nakapwesto ti pwersa ti estado iti innem a kampo a paramilitar iti lugar. Iti kasdiay, addaan tallo a paramilitar iti kada pito a lokal a residente.

Maysa iti nakaam-ames a krimen dagiti pulis ditoy ti panangpatay iti maysa nga 6-bulan a maladaga idi Enero 1 idiay Bijapur. Laksid ditoy, nailista met ti kaso ti panagdukot ken pammapatay iti tallo nga Adivasi idiay Nendra, Bijapur idi Enero 19. Dagiti biktima a da Madkam Soni, Punem Nangi, ken Karam Kosa ket mapan iti maysa a tignay-protesta idi dukoten dagiti pulis idiay bambantay a paset ti komunidad da. Kabayatan na idi Enero 30, pinaltogan ken napapatay dagiti pulis ni Ramesh Poyam, residente ti Bodga, Bastar, bayat a mapan iti karayan tapno agdigos.

Tapno kalluban dagiti krimen da, pinaruar dagiti pwersa ti estado a dagiti biktima ket natay iti engkwentro iti PLGA wenno di ketdi ket nairaman iti rinnupak iti nagbaetan na ken ti PLGA. Pinaawan kinaagpayso na amin dagitoy ti CPI-Maoist.

Nailista met dagiti grupo iti karbengan-tao idiay India ti sumagmamano a kaso ti aerial bombing aramat dagiti drone idiay abagatan ti Chhattisgarh idi Enero 13. Siguden a biktima dagiti makuna a komunidad ti mamin-ano a panangbomba agsipud pay 2022. Mangipagpagteng daytoy ti nakaro a buteng kadagiti Adivasi ken saan dan a makaubra a nasayaat.

Kakuyog ti militarisasyon idiay Central India iti korporatisasyon ken panagserrek dagiti dadakkel a kompanya iti nabaknang a kabakiran ti India. Iti linged ti panaglaban kadagiti Maoista, agserserbi dagitoy nga operasyon iti panangpakaro ti panaggamgam dagiti ganggannaet a dadakkel a korporasyon iti nainsigudan a kinakbaknang ti pagilian.

Pagkatkatayan dagiti reaksyonaryo nga estado ken dagiti kakumplot na a korporasyon ken imperyalista a pagilian a serreken ti Abujhmaad gapu ta maitudtuding daytoy a maysa iti kaudian a lugar idiay India a saan pay nagamgam ken agtaltalinaed a protektado ti kabakiran.

Ti PLGA ken CPI (Maoist) ti kakaisuna a katinnulong dagiti Adivasi idiay Abujhmaad iti biag ken patay a pannakidangadang para iti aglawlaw, daga da ken pagbiagan.