Ayuda ken suporta kadagiti apektado ti El Niño, ited! Nagpiket dagiti grupo ti mannalon ken mangngalap iti opisina ti National Food Authority (NFA) ken Department of Agriculture (DA) idiay Quezon City idi Abril 3. Tinubngar da ti dua nga ahensya ti rehimen Marcos iti panangbaybay-a ken kina-inutil na nga itedan ti ayuda dagiti mannalon ken mangngalap a sobra nga apektado kadagiti didigra ti El Niño.

Kompanya a Boskalis, pinagsungbat iti dadael idiay Manila Bay. Nagprotesta iti sango ti embahada ti The Netherlands idiay Manila idi Marso 22 dagiti grupo a maka-kalikasan, syentista, mangngalap ken dagiti residente kadagiti baybay ti Manila Bay tapno singiren ti Boskalis Westminster NV, maysa a kompanya a Dutch, iti impagteng na a dadael gapu iti dredging para iti proyekto a reklamasyon idi 2021-2023. Daytoy a dredging ket panagisagana para iti panangipatakder ti proyekto ti San Miguel Corporation a New Manila International Airport idiay Bulacan. Maysa a kapada a protesta ti insayangkat met idiay Papendrect, The Netherlands, nu sadinno nga adda ti kangrunaan nga opisina ti Boskalis.

Dagiti estudyante ti UST, nagkaykaysa kontra panangikuspil iti kampus. Nagirussuat ti tignay-protesta dagiti estudyante ti University of Sto. Tomas (UST) iti sango ti kampus na idiay Manila idi Marso 22 tapno kundenaren dagiti manangikuspil a patakaran iti unibersidad. Kasaruno ti sangsangkamaysa a panagtignay ti panagiwaragawag ti panagkaykaysa dagiti konseho ti estudyante, dagiti pagiwarnak, ken dadduma pay nga organisasyon iti kampus idi Marso 20 laban iti administrasyon ti UST. Indauloan dagiti aktibidad ti Rise for Education Alliance-España.

Ganggannaet a panangtagikua kadagiti eskwelaan ken panagngato ti tuition, tinubngar. Nagprotesta dagiti kabataan nga estudyante iti sango ti Commission on Higher Education (CHED) idiay Quezon City idi Marso 22 tapno tubngaren ti panangitandudo ti rehimen nga US-Marcos iti charter change a mangipalubos iti 100% panagtagikua ti ganggannaet kadagiti eskwelaan iti pagilian. Kinundenar da met ti agngayngayangay a panagngato ti matrikula kadagiti pribado nga unibersidad a kuna da ket sigurado nga aprubaran ti CHED kas “rubber stamp” dagitoy nga eskwelaan.

Serye ti panagikkat iti Nexperia, lablabanan. Nagprotesta idi Marso 22 iti uneg ti Laguna Industrial Science Park idiay Cabuyao, Laguna dagiti mangmangged ti Nexperia Philippines, kakuyog dagiti tagasuporta da, tapno supiaten ti nakakeddeng a panangikkat iti 54 a mangmangged iti Abril. Daytoy a panagikkat ket maikaduan iti uneg ti walo bulan. Ammo da a panggep ti serye dagiti panagikkat a rebbaen ti unyon a nakagun-oden kadagiti balligi iti sangsangkamaysa a panagtignay dagiti mangmangged iti naglabas.