Naballigi nga inangay manipud Marso 28 agingga Marso 29 idiay Amsterdam, The Netherlands, ti Internasyunal a Kumperensya iti Teorya kanaig dagiti krisis ti Imperyalista nga Ekonomya. Dinar-ayan daytoy ti 98 delegado ken mangibagbagi manipud kadagiti grupo ken partido a proletaryo, anti-imperyalista ken demokratiko manipud iti 18 pagilian. Maikadua a komperensya daytoyen a linukatan ti National Democratic Front of the Philippines (NDFP). Inrussuat idi Oktubre 2023 ti umuna a kumperensya a maipanggep iti panagirussuat ti gubat ti umili.

Basar iti pakaammo nga inruar ti komperensya, tinalakay iti dua-aldaw a panagtabuno dagiti agdama a galad ken padron dagiti krisis iti ekonomya iti uneg ti imperyalismo ken iti tengnga ti kumarkaro nga inter-imperyalista a risiris. Limmatak kadgiti diskusyon ti 1) kapitalista a nalabes a produksyon; 2) dagiti oligarkiya iti pinansya ken dagiti gubat ti pagtagilakuan; ken 3) ti sangalubongan a krisis a makagapu iti imperyalista a kinagamrud ken panagkamat ti superganansya.

Maysa kadagiti kangrunaan a nangibingay ti pannirigan ti Partido Komunista ti Pilipinas a nangisumite ti dokumento a nadauloan ti “Ipakpakita dagiti Imperyalista a Krisis a Naluomen ti Agang-angsab a Sistema para iti Sosyalista a Rebolusyon.” Tinalakay na dagiti nagdalanan a tukad ti pangkabuklan a krisis ti kapitalismo iti uneg ti imperyalismo–manipud umuna agingga iti agdama a maika-uppat a tukad na. Dinalanan na iti pakasaritaan ti disenyo dagiti makuna a krisis a pumagpagteng iti lalo a pannakalungsot ti kapitalismo ken panaglawa ti sosyalista a rebolusyon iti intero a lubong. Inladawan na ti antas ti kinalungsot ti agdama a maika-uppat a tukad ti sibubukel a krisis, a ginaladan ti panagkaro ti panangidadanes ken pananggundaway iti dasig mangmangged ken dadduma pay a maidaddadanes a dasig iti lubong iti uneg dagiti patakaran a neoliberal.

Nangipatulod met ti kontribusyon a dokumento ti Communist Party of India (Maoist). Linaon na nu kasano a naluomen ti agdama a kasasaad iti ekonomya para iti panagbangon manen ti proletaryo a rebolusonaryo a pannakidangadang.

Naisentro dagiti talakayan kadagiti 17 naipasa a pannirigan ken diskurso dagiti nangibagi kadagiti partido komunista, dagiti nailian a panangwayawaya a tignayan ken dagiti pormasyon a pangpulitika manipud idiay Australia, Belgium, Canada, Italy, Kurdistan, Pilipinas, Turkey, ken US, kasta met dagiti anti-imperyalista nga organisasyon a mangibagbagi kadagiti babbai, migrante, mangmangged pang-agrikultura, nakurapay iti syudad ken syentipiko.