Napnuan rebolusyonaryo a regta ken ragsak a nagrambak dagiti rebolusyonaryo a puersa ken masa iti aldaw ti maika-55 anibersaryo ti New People’s Army (NPA) iti naduma-duma a paset ti Ilocos ken Cordillera, karaman dagiti syudad ti rehiyon. Iti panagrambak, binasa ken tinalakay ti pahayag ti Komite Sentral ti Partido para iti maika-55 anibersaryo ti NPA. Sinaludoan da dagiti Nalabaga a kumander ken mannakigubat ti NPA ken rinaem iti kinatan-ok dagiti rebolusyonaryo a martir.

Insayangkat dagiti panagrambak iti naduma-duma a panagtatabuno kapada dagiti panagadal iti Abante a Kurso iti Partido ken Intermedya a Kurso iti Partido iti naudi a lawas ti Marso. Inallukoy kadagiti panagtatabuno dagiti naub-ubbing a kadre nga ibukbok ti panawen iti Nalabaga nga hukbo ken usaren dagiti oportunidad tapno makasursuro, agsanay ken agbalin a nalalaing a mannakigubat ti pagilian iti pulitika ken militar.

Inikkan regta dagiti panagrambak kadagiti pangkultura a panagpabuya kapada ti panagdaniw, daniw-garaw ken sangsangkamaysa a panagkanta kadagiti rebolusyonaryo a saniweng ken dagiti panagtatabubo.

Dagiti nakuna a panagrambak idiay Ilocos-Cordillera ket tungpa iti rupa ti Northern Luzon Command ti Armed Forces of the Philippines a nangideklara a narebbeken dagiti larangan gerilya ken rebolusyonaryo a tignayan ti rehiyon. Nagrupa a nengneng dagiti puersa ti militar ken pulis a todo-alerto a nagposte ken nagsiput pay uray kadagiti syudad ken sentro nga urban, nga iti sirok ti murdong ti agong da ket mangingatngato ti gemgem da ken gumgumluong dagiti kari dagiti rebolusyonaryo a puersa nga idur-as ti gubat ti umili iti maika-55 anibersaryo ti hukbo ti umili.