Napartak a nagipatulod kadagiti grupo ti Karapatan-Southern Tagalog ken dadduma pay a grupo idiay Batangas ken Quezon idi napalabas a lawas tapno siguraduen nga irespeto dagiti armado a puersa ti reaksyonaryo nga estado ti internasyunal a makatao a linteg. Simmuporta da iti masa a mannalon ken timmulong kadagiti kabagian dagiti Nalabaga a mannakigubat ti New People’s Army iti panangsigurado kadagiti karbengan da.

Idiay Batangas, inasikaso ti grupo ken pamilya ti panangala kadagiti bangkay dagiti mannakigubat a da Junalice Arante-Isita (Ka Arya), Bernardo Bagaas (Ka Mamay/Mike) ken Erickson Cueto (Ka Ricky/Vale) a napapatay iti panagatake ti 59th IB idi Marso 26 idiay Barangay Elvita (Tubahan), Rosario, Batangas.

Idiay Quezon, timmulong da iti pamilya da Divine Sureta (Ka Zoe) ken Paul Cruz (Ka Isko), dagiti mannakigubat a nagmartir iti engkwentro idiay Guiniyangan idi Marso 28.

Iti kapada a gundaway, nakalak-am da ti pananglipit manipud iti pulis ken militar. Sobra nga intantan ti pamilya iti panangala iti bangkay dagiti kabagian da ken binuribor uray dagiti komunidad a nagangayan ti lamay. Nupaykasta, natured da nga inrupir ti karbengan dagiti pamilya ken tinakderan a rumbeng nga irespeto ti internasyunal a makatao a linteg.

Maysa a grupo met ti impatulod da idiay Calauag, Quezon tapno ammoen ti kasasaad ni Randy Reota, inyulat ti militar a simmuko a kameng ti NPA idi Marso 25. Kayat da a siguraduen ti panangrespeto kadagiti karbengan ni Reota.