Iti uneg ti tallo aldaw, naiduron dagiti kabagian, gayyem ken dagiti kapada nga aktibista dagiti puersa ti estado ken ti rehimen Marcos nga ilung-aw da Francisco “Eco” Dangla III ken Joxelle “Jak” Tiong. Nadukot ti dua idi alas-8 ti rabii ti Marso 24 idiay Barangay Polo, San Carlos City, Pangasinan. Inwaragawag dagiti grupo iti karbengan-tao nga “awanen iti ima dagiti nangdukot kadakuada ti dua, bugbog sarado, ngem sibibiag” idi Marso 27.

Iti panagistorya dagiti nakayimatang, nadukot ti dua kalpasan a sadaen ti maysa nga SUV ti traysikel a nagluganan da. Dua agingga tallo a tao manipud iti SUV ken maysa pay a sakay ti maysa a motorsiklo ti nangbugbog ken nangisakay kadakuada iti lugan, kunada. Nangngeg da pay ti panagdawat ni Tiong ti tulong.

Ni Dangla, 39, ket sigud nga estudyante ti University of the Philippines ken agdama a tagapagsarita ti Bagong Alyansang Makabayan (Bayan)-Pangasinan. Bayat a ni Tiong, 29, gradweyt ti Universidad de Dagupan ket koordineytor ti Kabataan Partylist idiay Probinsya. Agpada da a taga-ummong (convenor) ti Pangasinan People’s Strike for the Environment, grupo a tumaktakder laban iti plano a black sand mining ken panangipatakder ti nuclear power plant idiay probinsya. Sakbay ti insidente, biktiman ti dua iti awan sardeng a Red-tagging, panangsiput, intimidasyon ken dadduma pay a porma ti pananglipit ti armado a puersa ti estado.

Dakkel ti nagbalin a tulong ti nasaknap a panagbirok ken panangparnuay ti tagari tapno mailung-aw dagiti biktima. Dagdagus a naiyulat ti insidente ti panangdukot kadakuada, naipaskil iti social media, naka-iruar kadagiti pahayag ken naka-ani ti suporta manipod kadagiti grupo a makakalikasan ken dadduma pay. Naipadamag met daytoy a dagdagus iti telebisyon.

Nagprotesta met a dagdagus dagiti tagasalaknib ti karbengan-tao idi Marso 25 idiay Quezon City tapno kundenaren ti panangdukot dagiti ahente ti AFP ken PNP iti dua. Nangbukel met kadagiti tim tapno sugsugen dagiti kampo militar ken istasyon ti pulis iti ayan dagiti biktima.

Paset ti kampanya ti iyuumay dagiti kabagian da Dangla ken Tiong, kakuyog ni Kabataan Representative Raoul Manuel, dagiti taong-simbaan ken dadduma pay a grupo idiay Camp Lt. Tito Abat, Barangay Calaoacan, Manaoag, Pangasinan, kampo ti 702nd IBde, 7th ID.

Nagdamag da idiay kampo ken nangidasar ti “inquiry” kasilpo ti ulat iti ingkapilitan a panangpukaw kada Dangla ken Tiong.