Inrussuat dagiti organisasyon ti masa nga anak ling-et idi Marso 26, idiay Recto Avenue idiay Manila, ti tinawen a Kalbaryo ti Masa nga Anak ling-et. Karaman kadagiti isyu nga insango dagiti kalaok iti Kalbaryo ti kumarkaro a krisis iti kabiagan, reklamasyon idiay Manila Bay ken demolisyon idiay Navotas ken panagred-tag kadagiti lider aktibista ken dagiti komunidad da. Awit da dagiti panawagan para iti panangingato ti sueldo ken pananggibus iti kontraktwalisasyon, panangduprak kadagiti unyon, pananglipit kadagiti mangmangged ken nasaknap a disempleyo iti nailian a kabisera.

Inrussuat met ti Kalbaryo ti Timog Katagalugan idi Marso 24. Awit-awit dagiti kalaok ti panagsupiat iti charter change ken panangidur-as ti pudno a reporma iti daga, makabiag a sueldo, nailian a soberanya, na-ingkalintegan a kappia. Iti kasaruno nga aldaw, nagturong da iti nailian a kabisera tapno irupir dagiti arunga-ing da kadagiti departamento ti empleyo, edukasyon ken aglawlaw.