Nangidanon ti buteng kadagiti residente ti insayangkat nga aerial bombing ti Armed Forces of the Philippines (AFP) kadagiti komunidad iti nagbeddengan ti Sta.Maria, Ilocos Sur ken Pilar, Abra idi Abril 2 ti aldaw. Saan a bumaba iti 212 pamilya ti nagbakwit gapu kadagiti panagbombomba ken pananglipit iti pagbiagan da. Laksid ditoy, ginasut a tropa ti militar met ti inggabur iti lugar para iti operasyon a kontra-insurhensya.

Ti panagusar ti napipigsa a bomba ket “likas nga indiscriminate” wenno awan pilpilyen na, mangisagsagmak iti biag ken pagbiagan dagiti sibilyan ken mangipagpagteng ti nalawa a pannakadadael ti aglawlaw. Iti kinapudno, labes iti ground zero ti epekto ti panagbombomba ti AFP manipud iti tangatang, maikaniwas iti ibagbaga ti 501st IBde a ti panagbombomba ket nakaturong laeng iti maysa a yunit ti New People’s Army (NPA)-Abra.

Pammapatay. Pinaltupaltugan agingga mapapatay ti 62nd IB ken dagiti pulis ti sibilyan a mannalon a ni Marlon Catacio idiay Sityo Ngalan, Barangay Quintin Remo, Moises Padilla, Negros Occidental idi Abril 4. Tapno tarayan ti panangsungbat, pinaruar ti militar a Nalabaga a mannakigubat ni Catacio a napapatay iti maysa nga engkwentro. Dagus a pinaulbodan daytoy ti mismo ina ti biktima.

Panagaresto. Kinemmeg ti 62nd IB ni Ronald Cantela idiay Sityo Pitik-pitik, Barangay Luz, Guihulngan City idi Marso 20. Parparuaren dagiti soldado a nakumpiskar iti balay na ti maysa a pistola. Dinadael met dagiti soldado dagiti arawaten ti pamilya bayat iti panagsukain.

Panangabuso. Inaprusan ken binastos ti maysa a nabartek nga elemento ti 59th IB ti maysa a balasitang idiay Sityo Sales, Barangay Pook, Balayan, Batangas idi Marso 28. Laksid ditoy, awan rasrason met a binugbog ti soldado ti 14-anyos a lalaki a kadua ti balasitang.

Pananglipit. Binutbuteng ken hinaras dagiti pinagtipon a puersa ti pulis, militar ken opisyal ti barangay ti tim dagiti boluntir nga agisaysayangkat ti imbestigasyon panggep iti epekto ti El Niño kadagiti mannalon ken residente ti Barangay Sampaga, Balayan, Batangas agsapa ti Marso 24.