Nagsasaruno a panagadal ken talakayan ti naballigi nga inrussuat ti New People’s Army (NPA) kadagiti probinsya ti Agusan ken Surigao del Sur iti umuna a kuarto ti 2024. Bunga ti naimpapusoan a panangawat ti komite ken dagiti kameng ti Partido iti panawagan ti Komite Sentral nga irussuat ti tignayan a panagilinteg kadagiti trabaho iti ideolohiya, inggaed ken determinado nga inrussuat ti NPA ditoy dagiti panagadal ken talakayan iti tengnga ti sustenido nga operasyon ti kabusor.

Rinugian da daytoy iti panagadal iti pahayag ti Partido iti maika-55 anibersaryo nu sadinno tallo a grupo ti nakaleppas iti istagard a panagadal. Ti umuna a grupo ket inyun-una ken dinar-ayan dagiti kameng ti seksyon komite ken larangan gerilya. Kaadoan kadagiti dimmar-ay ket nau-ubbing a kadre a mangbukbukel iti 74% ken 26% met ti nataengan a kadre. Bimmayag ti sibubukel a panagadal iti 18 oras ken 30 minuto. Basa-talakay ken chalk-talk ti nagbalin a wagas iti panagtalakay dagiti kakadua.

Iti kolektibo a diskusyon, nagbalin a nabiag ti talakayan dagiti kakadua gapu iti panangibingay kadagiti kapadasan da iti panangriing, panangorganisa ken panangpatignay iti masa ken nu kasano nga indauloan ti panangidur-as ti gubat ti umili idiay probinsya kagiddan ti napakumbaba a panagamiris ken panangawat kadagiti partikular a kakapuyan ken kakurangan a nagresulta iti sumagmamano a pannakapaay iti panangsango iti atake ti kabusor.

Kabayatan na, rinugian dagiti kadua ti maika-dua a grupo ti panagadal a bukbuklen ti amin a kameng ti Partido iti uneg ti hukbo manipud kadagiti kandidato ken naan-anay a kameng (40% ken 60%). Nagserbi nga instruktor da dagiti kadua nga immunan a nakaturpos. Ingkagumaan a mapalag-an ti taray ti talakayan iti panangpartuat kadagiti simple a biswal kapada ti drowing iti mapa ti lubong tapno nalaklaka a mailadawan kadagiti agad-adal dagiti pagilian nga imperyalista ken nu sadinno daytoy nga agirusrussat itatta ti proxy war, naipakita met kadagiti kadua ti aplag dagiti pagilian nga atrasado wenno kolonya ken semikolonya a mangidurdur-as ti armado a pannakidangadang.

Numanpay basa-talakay latta ti pamuspusan, naaramid a medyo mapabassit ti kabuklan a kapaot ti panagadal. Iti maikatlo a bats, situtured nga inawat ti sumagmamano kadagiti kakadua nga addaan potensyal iti panagisuro ti rebbengen nga agsanay nga agserbi nga instruktor para iti maudi a grupo a binukel dagiti Nalabaga a mannakigubat a saan pay a kameng ti Partido.

Segun kadagiti kadua, dakkel ti naitulong kadakuada ti panagadal iti pahayag ti Partido. Nangted daytoy ti kabarbaro a pigsa ken nayon a tibker tapno mas pasingkedan ti pangngeddeng a lumaban ken agtultuloy iti armado a pannakidangadang.

“Mas nagbalin a kongkreto kadakuada ti panagbalin a tarabay ti Partido tapno mas maawatan ti napartak a panagbaliw ti kasasaad,” kuna ni kadua Del, maysa kadagiti nagadal. Nagserbi met daytoy a silaw kadagiti kadua a napakapuyan ti nakem ken nakamakam met ida a bumangon manipud iti pannakailumlom kadagiti negatibo a kapanunotan. Maysa kadagitoy ni Ka Maja, maysa nga ina a nu maminsan ket malmalmes iti pannaka-iliw kadagiti annak na.

Nagserbi a karit met kenni Ka Che a mas agpakatibker ken sangoen dagiti karit iti panagakem kadagiti komprehensibo a trabaho. “Mariknak ti pangkasapulan a doble a panaggaed tapno dumur-as ken tumibker kas kameng ti Partido,” kunana.

Dagiti simmaruno a talakayan ket paset ti panagadal kadagiti topiko iti Padepa (Pambansa Demokratikong Paaralan) tapno sublian-adal ken awaten dagiti partikular a rebbengen manipud iti antas komite ti Partido, iti sibubukel a kameng na, agingga iti trabaho iti platun ken dagiti katinnulong na. Dagiti panagadal ket panagisagana metten iti plano a panagirussuat ti Basaran a Kurso ti Partido.

Iti kabuklan, naragsak ken naregta dagiti kadua iti panangsango kadagiti karit ken nadanon ti panggep a rugianan ti tignayan a panagilinteg, agkonsolida, kitaen ti tunggal partikularidad nu sadinno a nagkurang ken nagbiddut ken determinado a ringbawan dagiti kakapuyan tapno lalo pay a dumur-as kadagiti sumaruno a panawen.