Nagkakaisa sa diwa, nakakuyom ang kamao na ipinagdiwang ng mga kadre at kasapi ng Partido Komunista ng Pilipinas, mga mandirigma at kumander ng Bagong Hukbong Bayan (BHB), ng mga alyadong organisasyon ng National Democratic Front of the Philippines (NDFP) at ng rebolusyonaryong masa ang ika-55 anibersaryo ng BHB noong Marso 29.

Agkaykaysa iti pakinakem, nakapetpet ti gemgem a rinambakan dagiti kadre ken kameng ti Partido Komunista ti Pilipinas, dagiti mannakigubat ken kumander ti New People’s Army (NPA), dagiti alyado nga organisasyon ti National Democratic Front of the Philippines (NDFP) ken ti rebolusyonaryo a masa ti maika-55 anibersaryo ti NPA idi Marso 29.

Kagiddan ti anibersaryo, nagpanawagan ti Komite Sentral ti panglagip kadagiti nagun-od ti hukbo ti umili ken dagiti kakurangan iti naglabas a tawen, panangadaw kadagiti adal manipud kadagitoy, ken panangbukel ti plano tapno gun-oden ti daddadakkel a balligi iti panangidur-as ti rebolusyonaryo nga armado a pannakidangadang iti sumangbay a tawen.

Siraragsak met nga impakaammo ti Komite Sentral a ti panawagan para iti tignayan a panagilinteg nga inruar ti Partido idi naglabas a Disyembre 2023 ket sipupuso nga inarakup ti amin a pangrehiyon a komite ti Partido ken kumand ti NPA. “Positibo ti nagbalin a sungbat da ken agdama nga agisaysayangkat kadagiti komperensya ti panaglagom ken dagiti pulong-panagadal tapno kitaen dagiti panagbiddut ken nagkurangan tapno ilinteg dagidiay, natibker ken komprehensibo nga idur-as ti amin a rebolusyonaryo a rebbengen,” kuna ti Komite Sentral.

Inatasan met ti daulo ti Partido ken NPA nga agirussuat kadagiti basaran a taktikal nga opensiba a kabaelan nga iballigi, a mangpakpakapsut iti kabusor babaen iti paset-paset a panangparmek iti armado a puersa na, ken mangsamsamsam kadagiti armas na. “Ingatngato tayo ti kabaelan ti NPA iti pannakigubat babaen iti pannakigubat,” nakuna na pay.

Dagiti panagrambak ken aktibidad

Agsipud katengngaan ti Marso, inrussuat kadagiti larangan gerilya ken syudad, manipud Luzon agingga Mindanao—dagiti limed a panagtatabuno para iti anibersaryo ti hukbo ti umili.

Idi Marso 25, nagirussuat ti lightning rally idiay Recto Avenue, Manila ti naduma-duma a rebolusyonaryo nga organisasyon idiay National Capital Region (NCR) tapno saludoan ti NPA. Inyun-una ti panagtinay ti NDF-NCR a linaokan kangrunaan dagiti kameng ti Kabataang Makabayan (KM) ken Artista at Manunulat ng Sambayanan (Armas). Kunada, rumbeng a palataken ken saludoan iti tunggal suli ti rehiyon ti armado a panaglaban kas kangrunaan a langa ti pannakidangadang ken ipaarakop daytoy iti umili.

Idiay Rizal, nagiwaras ti polyeto dagiti kameng ti NDF-Rizal kadagiti dimmar-ay ken nakimaymaysa iti tradisyonal nga Alay-Lakad, a lalaokan ti minilyon a Katoliko, idiay Antipolo City idi Marso 28. Kabigatan, Marso 29, insab-it da ti insagana a putar a balatengga kadagiti natao a lugar idiay ili ti Taytay.

Inyun-una met dagiti balangay ti KM ti panagrambak iti uneg dagiti kangrunaan nga unibersidad iti pagilian. Nagipinta da kadagiti panawagan ken nagipigket kadagiti poster idiay Polytechnic University of the Philippines idiay Sta. Mesa, Manila, University of the Philippines (UP)-Visayas idiay Miag-ao, Ilo-ilo, UP Los Baños ken UP Cebu.

Nagirussuat met ti oplan pinta ti Christians for National Liberartion, Katipunan ng mga Gurong Makabayan, Makabayang Samahang Pangkalusugan, Liga ng Agham para sa Bayan, ken Armas idiay Quezon City, Pasig City ken Manila City. Nagiruar met ti pahayag ti Makabayang Kilusan ng Bagong Kababaihan. Impanawagan da ti pannakilaok dagiti bukod da a sektor iti gubat ti umili ken kumameng iti NPA.

Kabayatan na, adda met dagiti panagtatabuno ken aktibidad dagiti yunit ti NPA kadagiti rehiyon nga agraraira daytoy.

Internasyunal a kablaaw

Nangidanon met ti kablaaw ti sumagmamano a partido ken organisasyon idiay sabali a pagilian iti panagrambak ti anibersaryo ti NPA. Iti pahayag ti Communist Party of India (Maoist), impakaammo na ti talek iti rebolusyonaryo a tignayan iti Pilipinas a maringbawan na dagiti temporaryo a panagatras ken lapped ken maka-abante padur-as.

Nagpahayag met ti panangbigbig iti hukbo ti umili ti Friends of the Filipino People in Struggle ken Anti-Imperialist Action Ireland (AIAI). Kas panagkablaaw da, nagisayangkat ti oplan pinta ti AIAI idiay Galaway, Ireland.

Rinambakan met idiay Amsterdam, the Netherlands ti anibersaryo ti NPA kagiddan ti panaglippas ti inrussuat a teoretikal a komperensya ti NDFP idi Marso 28-29. Dimmar-ay iti panagtatabuno ti 98 delegado manipud kadagiti siyam a pagilian.