PASPAS NGA NAGPADALA og mga grupo ang Karapatan-Southern Tagalog ug iba pang grupo sa Batangas ug Quezon niadtong milabayng semana aron siguruhon nga pagatahuron sa mga armadong pwersa sa reaksyunaryong estado ang internasyunal nga makitawhanong balaod. Miabag sila sa masang mag-uuma ug mitabang sa mga pamilya sa mga Pulang manggugubat sa Bagong Hukbong Bayan sa pagsiguro sa ilang mga katungod.

Sa Batangas, giatiman sa grupo ug pamilya ang pagkuha sa mga patayng lawas sa mga Pulang manggugubat nga silang Junalice Arante-Isita (Ka Arya), Bernardo Bagaas (Ka Mamay/Mike) ug Erickson Cueto (Ka Ricky/Vale) nga napatay sa pag-atake sa 59th IB niadtong Marso 26 sa Barangay Elvita (Tubahan), Rosario, Batangas.

Sa Quezon, mitabang sila sa pamilya nilang Divine Sureta (Ka Zoe) ug Paul Cruz (Ka Isko), mga manggugubat nga namartir sa engkwentro sa Guiniyangan niadtong Marso 28.

Sa parehong higayon, gipig-ot sila sa pulis ug militar. Hilabihan nga gilangan ang pamilya sa pagkuha sa patayng lawas sa ilang mga paryente ug gitugaw bisan ang mga komunidad kung asa ipahigayon ang haya. Bisan pa man, maisugon nilang giduso ang katungod sa mga pamilya ug mibarog nga kinahanglang tahuron ang internasyunal nga makitawhanong balaod.

Usa ka grupo usab ang ilang gipadala sa Calauag, Quezon aron sutaon ang kahimtang ni Randy Reota, gitaho sa militar nga misurender nga myembro sa BHB niadtong Marso 25. Gusto nilang siguruhon ang pagtahud sa mga katungod ni Reota.