MADASIG NGA NAGPADALA sang mga grupo ang Karapatan-Southern Tagalog kag iban pa nga grupo sa Batangas kag Quezon sadtong nagligad nga semana para siguraduhon nga pagatahuron sang mga armadong pwersa sang reaksyunaryong estado ang internasyunal nga makitawhanon nga laye. Nagbulig sila sa mga masang mangunguma kag nag-alalay sa mga himata sang mga Pulang hangaway sang Bagong Hukbong Bayan sa pagpasiguro sang ila nga mga kinamatarung.

Sa Batangas, ginhikot sang mga grupo kag pamilya ang pagkuha sa mga bangkay sang mga hangaway nga sila ni Junalice Arante-Isita (Ka Arya), Bernardo Bagaas (Ka Mamay/Mike) kag Erickson Cueto (Ka Ricky/Vale) nga napatay sa pag-atake sang 59th IB sadtong Marso 26 sa Barangay Elvita (Tubahan), Rosario, Batangas.

Sa Quezon, nagbulig sila sa pamilya nila ni Divine Sureta (Ka Zoe) kag Paul Cruz (Ka Isko), mga hangaway nga namartir sa engkwentro sa Guiniyangan sadtong Marso 28.

Sa pareho nga higayon, nag-agum sila sang pagpang-ipit halin sa pulis kag militar. Tuman nga gin-atrasar ang pamilya sa pagkuha sang bangkay sang ila mga himata kag gintublag pati ang mga komunidad nga pagahiwatan sang pulaw.

Amo man, maisog nila nga ginduso ang kinamatarung sang mga pamilya kag nanindugan nga dapat tahuron ang internasyunal nga makitawhanon nga laye.

Isa ka grupo man ang ginpadala nila sa Calauag, Quezon para hibal-on ang kahimtangan ni Randy Roeta, ginbalita sang militar nga nagsungka nga katapo sang BHB sadtong Marso 25. Gusto nila nga sigurohon ang pagtahod sa mga kinamatarung ni Roeta.