Nagdala og kahadlok sa mga residente ang gihimong aerial bombing sa Armed Forces of the Philippines (AFP) sa mga komunidad sa utlanan sa Sta. Maria, Ilocos Sur ug Pilar, Abra niadtong Abril 2 sa udto. Dili moubos sa 212 ka pamilya ang mibakwit tungod sa mga pagpamomba ug pagpamig-ot sa ilang panginabuhian. Gawas dinhi, gatusan ka tropang militar usab ang gibubu sa lugar alang sa operasyong kontra-insurhensiya.

Ang paggamit og hilabihan ka kusog nga bomba “natural nga paturagas” o walay ginapili, peligroso sa kinabuhi ug panginabuhian sa mga sibilyan ug nagabunga og malukpanong pagkaguba sa kinaiyahan. Gani, labaw pa sa ground zero ang epekto sa pagpamomba sa AFP gikan sa ere, sukwahi sa ginasulti sa 501st IBde nga ang pagpamomba nakapunting lamang sa usa ka yunit sa Bagong Hukbong Bayan (BHB)-Abra.

Pagpatay. Girakrakan hangtud mapatay sa 62nd IB ug mga pulis ang sibilyang mag-uuma nga si Marlon Catacio sa Sityo Ngalan, Barangay Quintin Remo, Moises Padilla, Negros Occidental niadtong Abril 4. Aron likayan ang tulubagon, gipagawas sa militar nga Pulang manggugubat si Catacio nga napatay sa usa ka engkwentro. Dihadiha kining gipanghimakak sa mismong inahan sa biktima.

Pag-aresto. Gidakop sa 62nd IB si Ronald Cantela sa Sityo Pitik-pitik, Barangay Luz, Guihulngan City niadtong Marso 20. Gipagawas sa mga sundalo nga nakumpiska sa iyang balay ang usa ka pistola. Giguba usab sa mga sundalo ang mga gamit sa pamilya samtang nangransak.

Pag-abuso. Gihilam ug gibastos sa usa ka hubog nga elemento sa 59th IB ang usa ka dalagita sa Sityo Sales, Barangay Pook, Balayan, Batangas niadtong Marso 28. Gawas dinhi, wala usay hinungdan nga gikulata sa sundalo ang 14-anyos nga lalaki nga kauban sa dalagita.

Pangpamig-ot. Gihadlok ug giharas sa giusang mga pwersa sa pulis, militar ug upisyal sa barangay ang tim sa mga boluntir nga nagpahigayon og imbestigasyon mahitungod sa epekto sa El Niño sa mga mag-uuma ug residente ng Barangay Sampaga, Balayan, Batangas niadtong kaadlawon sa Marso 24.