Sulod sa tulo ka adlaw, natukmod sa mga pamilya, higala ug mga kaubang aktibista ang mga pwersa sa estado ug ang rehimeng Marcos nga ilutaw silang Francisco “Eco” Dangla III ug Joxelle “Jak” Tiong. Gidagit ang duha niadtong alas-8 sa gabii sa Marso 24 sa Barangay Polo, San Carlos City, Pangasinan. Gianunsyo sa mga grupo sa tawhanong katungod nga “wala na sa kamot sa mga midagit kanila ang duha, gibun-og pag-ayo, pero buhi” niadtong Marso 27.

Sa saysay sa mga saksi, gidagit ang duha human giharang sa usa ka SUV ang traysikel nga gisakyan nila. Duha hangtud tulo ka tawo gikan sa SUV ug usa pa ka sakay sa usa ka motorsiklo ang namun-og ug nagsakay kanila sa sakyanan, matud nila. Nadungog pa nila ang pagpangayo ni Tiong og tabang.

Si Dangla, 39, usa ka kanhing estudyante sa University of the Philippines ug kasamtangang tigpamaba sa Bagong Alyansang Makabayan (Bayan)-Pangasinan. Samtang si Tiong, 29, gradweyt sa Universidad de Dagupan usa ka koordineytor sa Kabataan Partylist sa prubinsya. Pareho silang tigtapok sa Pangasinan People’s Strike for the Environment, grupong mibarog batok sa planong black sand mining ug pagtukod og nuclear power plant sa prubinsya. Ayha ang insidente, biktima na ang duha sa walay hunong nga Red-tagging, pagpaniktik, intimidasyon ug uban pang porma sa pagpamig-ot sa armadong pwersa sa estado.

Daku ang nahimong tabang sa malukpanong pagpangita ug paghimo og kasaba aron mapalutaw ang mga biktima. Dihadiha nga nataho ang insidente sa pagdagit kanila, na-post sa social media, nakapagula og mga pamahayag ug miani og suporta gikan sa mga grupong makikinaiyahan ug uban pa. Nabalita gilayon usab kini sa telebisyon.

Dihadiha usab nga nagprotesta ang mga tigpanalipud sa tawhanong katungod niadtong Marso 25 sa Quezon City aron kundenahon ang pagdagit sa mga ahente sa AFP ug PNP sa duha. Nagtukod usab og mga tim aron susihon ang mga kampo militar ug istasyon sa pulis sa gikahimutangan sa mga biktima.

Kabahin sa kampanya ang pag-adto sa mga paryente nilang Dangla ug Tiong, kauban si Kabataan Representative Raoul Manuel, mga tawong-simbahan ug uban pang mga grupo sa Camp Lt. Tito Abat, Barangay Calaoacan, Manaoag, Pangasinan, kampo sa 702nd IBde, 7th ID. Giusisa nila ang kampo ug naghaon og “inquiry” kalabot sa taho sa pugos nga pagkawala nilang Dangla ug Tiong.