INSAYANGKAT TI NADUMADUMA nga organisasyon iti intero a lubong idi Hulyo 1 dagiti aktibidad ken protesta da kas paset ti sangalubongan nga aldaw ti tignay laban iti Operation Kagaar iti India. Iti sidong daytoy nga operasyon, a narugian a maipatungpal idi Enero, saan a bumaba iti 130 sibilyan ken rebolusyonaryo ti pinapatayen ti estado ti India.

Ti Operation Kagaar a narugian idi 2017, ket maysa nga operasyon militar a paset ti nasaksaknap pay nga operasyon a kontra-insurhensya nga Operation SAMADHAN-Prahar iti India. Iti linged ti pananglaban kadagiti Maoista, sipaparang a matartarget dagiti Adivasi (dagiti katutubo) ti India a makidangdangadang para iti karbengan da iti daga, kabakiran, danum ken biag.

Nangipeksa ti pannakikaykaysa iti aldaw ti tignay ti International League of Peoples’ Struggles Commission 10 ken International Indigenous Peoples’ Movement for Self-Determination & Liberation. Adda met ti tignay dagiti grupo manipud India, China, Russia, Turkey ken dagiti pagilyan iti Europe. Nagiyebkas met ti panagsupyat iti Operation Kagaar dagiti demokratiko nga organisasyon ti Pilipinas iti protesta idi Hulyo 1.

Nagdeklara met ti Komite Sentral ti Partido Komunista ng Pilipinas ti Bulan ti Pannakikaykaysa (Hunyo 20-Hulyo 20) iti dangadang ti umili nga Indian, nangruna iti masa nga Adivasi laban iti Operation Kagaar.