GATUSAN KA KATAWHAN, nag-una mga mag-uuma ug mangingisda, gikan sa Metro Manila, Southern Tagalog ug Central Luzon ang nagmartsa niadtong Hulyo 1 padulong sa Mendiola aron kondenahin ang rehimeng Marcos sa mga paantus ug kontra-katawhang mga palisiya niini sa milabayng duha ka tuig. Gipapanubag nila ang rehimen sa nagkagrabeng krisis sa ekonomiya nga giatubang sa katawhang Pilipino. Para sa mga mag-uuma, nag-unang giatubang nila sa milabayng duha ka tuig mao ang paggrabe sa krisis sa bugas, taas nga presyo sa pagkaon ug, labaw pang nagkagrabeng kahimtang sa sektor sa agrikultura.

Adunay susama nga mga aktibidad ug protesta sa uma ang mga mag-uuma ug grupo sa Ilocos, Southern Tagalog, Bicol, Central Visayas, Panay ug Negros.