GIPAHIGAYON SA LAIN-LAING mga organisasyon sa tibuok kalibutan niadtong Hulyo 1 ang ilang mga aktibidad ug protesta isip kabahin sa kalibutanong adlaw sa pagbatok sa Operation Kagaar sa India. Ilalum sa maong operasyon, nga gipatuman niadtong Enero, dili moubos sa 130 ka sibilyan ug mga rebolusyonaryo ang gipamatay sa estado sa India.

Ang Operation Kagaar mao ang usa ka operasyong militar nga kabahin sa mas malangkubong operasyong kontra-insurhensiya nga Operation SAMADHAN-Prahar sa India nga gisugdan niadtong 2017. Dayag niining ginatarget ang mga Adivasi (mga minorya) sa India nga nakigbisog alang sa ilang katungod sa yuta, kalasangan, tubig ug kinabuhi sa takuban sa ilang pagsumpo sa mga Maoista.

Nakighiusa sa adlaw sa protesta ang International League of Peoples Struggles Commission 10 ug International Indigenous Peoples Movement for Self Determination & Liberation. Naglunsad usab og protesta ang mga grupo gikan sa India, China, Russia, Turkey ug mga nasud sa Europe. Nagpadayag usab og pagbatok sa Operation Kagaar ang mga demokratikong organisasyon sa Pilipinas sa protesta niadtong Hulyo 1.

Nagdeklara usab ang Komite Sentral sa Partido Komunista ng Pilipinas sa Bulan sa Pakighiusa (Hunyo 20-Hulyo 20) sa pakigbisog sa katawhang Indian, ilabina sa masang Adivasi batok sa Operation Kagaar.