Iti tingnga ti nasaknap a bisin ken kinarigat, inyanunsyo idi kalman ni Gilbert Teodoro, kalihim ti Department of Defense, ti plano ti Armed Forces of the Philippines (AFP) a gumatang kadagiti misayl ken 40 nga eroplano a pakigubat iti balor a ₱300-₱400 bilyon. Gatangen dagitoy manipod kadagiti Amerikano a kumpanya iti armas ken dagiti subsidyaryo da.

Iti agdama, makunkuna nga adda 224 pangtangatang a lugan a panggerra ti AFP. Maus-usar dagitoy kadagiti awanan bibiang a panagbomba iti kabakiran ken dagiti sibilyan a komunidad iti agam-amangaw a panggep ti AFP a “parmeken” ti rebolusyonaryo a tignayan.

Di kumurang iti 60 ti naisurat ti Ang Bayan a kaso ti panagbomba, panagkanyon ken istraping manipod Hulyo 2022 agingga Hunyo 2024. Ti 32 kadaytoy ket aerial bombing wenno panangitinnag ti di kumurang iti uppat a dadakkel a bomba usar dagiti FA-50, Super Tucano ken dagiti pang-atake nga helicopter.

Kaadoan ti naisurat a panagbomba ken panag-istraping idiay Bukidnon, kasaruno idiay Northern Samar, Abra, Kalinga, Cagayan ken Aurora. Adda met dagiti panagbomba idiay Oriental Mindoro, Western Samar, Misamis Oriental, Apayao, Surigao del Sur, Agusan del Norte, Iloilo, Negros Occidental, Quezon ken Camarines Sur, Nueva Vizcaya, Agusan del Sur, Zamboanga del Norte, Negros Oriental, Masbate ken Samar.

Iti amin a kanito, kagiddan dagitoy a panagbomba ti panagkanyon ken nasaklaw ken nabayag nga operasyon a kombat ti militar a paggapgapoan ti nasaknap a panagabuso ken dagiti panaglabsing iti karbengan dagiti sibilyan.