Nasurok 100 a tattao ti dimmar-ay iti naisayangkat a programa ti pammadayaw para kadagiti Bannuar ken Martir ti Agosto ti Panay idi Agosto 26 sadiay Iloilo. Dimmar-ay dagiti gayyem, pamilya ken dagiti sigud a kadua dagiti 11 naidasay a Nalabaga a mannakigubat ti New People’s Army (NPA)-Panay ken dagiti kadre ti Partido Komunista ti Pilipinas iti rehiyon. Nagmartir da iti nagsasaruno nga armado nga engkwentro idi Agosto idiay Iloilo ken Antique.

Ti aldaw ti pammadayaw ket inrana iti maika-74 a kasangay ni Ka Concha Araneta-Bocala, maysa kadagiti nagmartir. Nagserbi ni Ka Concha kas maysa iti kangrunaan nga opisyal ti Pangrehiyon a Komite ti Partido idiay Panay ken konsultant ti National Democratic Front of the Philippines.

Binasa iti programa ti pammadayaw ti Komite Sentral ti Partido kadagiti Bannuar ken Martir ti Agosto ti Panay. Inikkan na ti kangatoan a pammadayaw ni Vicente Hinojales (Ka Hadjie/Ka Emil), kagawad ti Komite Sentral ken kalihim ti Pangrehiyon a Komite ti Partido iti isla. Nangidaulo isuna iti rehiyon ti Panay manipud 2016, kalpasan a nagakem ti napateg a paset iti komprehensibo a panagdur-as dagiti rebolusyonaryo a pannakidangadang idiay Northeast Mindanao manipud 2006 agingga 2016.