Dagiti protesta iti panaglukat dagiti unibersidad. Ginasot nga agtutubo kadagiti unibersidad ti nagirussuat kadagiti protesta idi Agosto kas panangsabat iti panaglukat ti klase. Impannawagan da ti nayon-pondo para iti edukasyon, panangpasardeng iti komersyalisasyon iti edukasyon, panangsuppiat iti panagngato ti matrikula ken dadduma pay a mabayadan, panangitandudo iti akademiko a wayawaya ken dadduma pay. Impalgak da met ti dadduma nga isyu ti pagilian. Addaan panagtignay iti amin a kampus ti University of the Philippines. Nai-report dagiti protesta iti University of Sto.Tomas, Ateneo de Manila University, Far Eastern University, Saint Louis University, Pamantasan ng Lungsod ng Maynila, Technological University of the Philippines-Manila ken Bulacan State University.

Dagiti katutubo idiay South Cotabato, nagummong kontra-minas. Nasurok 500 katutubo a B’laan ken Tiboli ti nagummong idiay Sityo Tablo, Barangay Maan, T’boli, South Cotabato idi Agosto 22 tapno ipadanon iti NCIP ti panangsuppiat da iti panagminas ti 88 Kiamba Mining and Development Corporation ken amin a dadduma pay nga aplikasyon para iti panagminas iti lugar da. Ti panaggu-ummong ket sungbat iti impaayab a konsultasyon ti NCIP, ngem saan a nagpakita ti ahensya.