Nangisayangkat ti misa (liturgical celebration) ti National Council of Churches of the Philippines (NCCP) ken Philippine Ecumenical Peace Forum idi Setyembre 1 tapno lagipen ti maika-32 tawen a panangpirma iti The Hague Joint Declaration dagiti mangibagbagi ti National Democratic Front of the Philippines (NDFP) ken ti Government of the Republic of the Philippines (GRP) idiay The Hague, Netherlands. Linaon daytoy a deklarasyon ti balabala ti negosasyon ken ti panagsasaruno dagiti sustantibo nga linaon tapno magun-od ti nainkalintegan ken naunday a kappia.

Sakbay na, kinundenar dagiti rebolusyonaryo a pwersa ti kinuna ni Eduardo Ano, National Security Adviser, a nangibaga a saan na a makita a matuloy ti tungtongan a pangkappia. Maikaniwas daytoy iti naibaga a “positibo” ti rehimen a Marcos nga agbunga ti tungtungan iti maysa a “pinal a katulagan”.

Iti sango ti agsusupadi a senyales manipud iti GRP, pinasingkedan ti NDFP ti kinasagana na para iti tungtungan kas epektibo a wagas tapno masolbar dagiti ramut ti agdama a gerra sibil. Sigun met iti Partido Komunista ti Pilipinas, ti panagabante ti tungtongan ket naan-anay a nakadepende iti pigsa ti boses ti umili a Pilipino ken iti sangsangkamaysa a panangiduron da iti rehimen a Marcos a dumngeg iti nabayagen a pukkaw para iti pudno a reporma iti daga ken nailian nga industriyalisasyon ken ti kiddaw para iti pananggibos kadagiti panagabuso iti karbengan-tao ken internasyonal a makatao a linteg.