Kagiddan ti panagado dagiti detatsment ti militar ti panagserrek ti adu a kumpanya iti panagminas iti Agusan del Sur ken Surigao del Sur, kangrunaan iti nabaknang iti mineral nga Andap Valley Complex. Dagitoy a minasan ket tagtagikuaen dagiti kadakkelan a kumprador ken dagiti kasosyo da a dadakkel a gangannaet a kumpanya.

Segun iti Mines and Geosciences Bureau idi Agosto, saan a bumaba iti 13 Mineral Production Sharing Agreement ti insagut ti nailyan ken lokal a gubyerno kadagiti kumpanya tapno agminas iti nadumaduma a paset ti Agusan del Sur ken Surigao del Sur. Adda met ti inted daytoy nga uppat nga exploratory permit, tallo nga small scale mining contract, dua a minahang bayan, maysa nga special mines permit ken maysa a mineral processing permit.

Kabilang kadagiti addaan kalawaan nga operasyon ti Marcventures Mining and Development Corporation (kadagupan a 9,659 ektarya), CTP Construction & Mining Corporation (8,452 ektarya), Ludgoron Mining Corporation (2,062 ektarya), Kafugan Mining, Inc (1,186 ektarya), Philsaga Mining Corporation, (8,548 ektarya), Philex Gold Philippines, Inc. (6,207 ektarya) ken Consolidated Ores Philippines, Inc (1,953 ektarya). Ti Marcventures ken ti kapartner na a Bright Kindle Resources & Investments, Inc. ket paset ti RYM Business Management Corporation a sanikua ti pamilya ni House Speaker Martin Romualdez.

Idi Hulyo, nagsumite ti nayon nga aplikasyon iti panagminas ti Benguet Corporation a sanikua met laeng dagiti Romualdez tapno agminas ti karbon kadagiti ili ti San Miguel, Marihatag ken Tago. Dimmawat daytoy ti lisensya tapno saklawen ti 12 a “coal block” iti lugar, kabatog ti 12,000 ektarya. Kontrolado dagiti Romualdez ti Benguet Mining manipud pay iti panawen ti diktadura a Marcos Sr. Kasosyo da tatta ti kumpanya nga Amerikano a Rothschild Investment LLC.

Kasosyo met ti Philex Mining, sanikua ti dakkel a burges kumprador a ni Enrique Razon, ti Medusa Mining Limited, maysa a kumpanya nga Australian. Maysa met a kumpanya nga Australian (Ten Sixty Four Limited) ti kasosyo ti Philsaga Mining, a sanikua dagiti dati a soldado ken paramilitar.

Ti Benguet Corporation ket maysa kadagiti kumpanya a nakinabang, nu saan a nangiduron iti brutal a militarisasyon iti Andap Valley Complex. Ti dadduma pay a kumpanya ket ti Abacus Coal Exploration and Development Corp, ken ti kasosyo daytoy nga Oriental Vision Mining Philippines (ORVI) Corp ti pamilya Zamora. Sakupen ti aplikasyon ti ORVI ken Abacus ti 5,000-ektarya a kabakiran iti AVC. Ti dadduma pay a kumpanya ket ti Great Wall Mining and Power Corp a maysa a kumpanya a Chinese; ASK Mining and Exploration Corp nga idi pay 2009 a naikkan ti permit para iti eksplorasyon ken ti CoalBlack Mining Corp.

Masarakan iti Andap Valley ti maysa kadagiti kadakkelan a reserba a karbon iti intero a lubong. Sakupen daytoy ti agkakabangibang nga ili ti San Miguel, San Agustin, Marihatag, Cagwait, Tago ken Lianga iti Surigao del Sur.

Iti unos ti naunday a panawen, nalapdan ti panaggamrud dagitoy a kumpanya iti Andap Valley gapu iti nairut a panagsupyat ti masa a Lumad, ken ti panagkedked da nga agited ti free and prior informed consent. Manipud 2015, naipasidong ti San Miguel, San Agustin, Marihatag, Cagwait, Tago ken Lianga iti brutal a panagari ti militar tapno pawilan ti panaglaban dagiti Manobo ken Mamanwa, ken pwersaen isuda nga ibbatan ti karbengan da iti ansestral a daga da.

Kabilang kadagiti krimen ti militar dagiti masaker iti Lianga idi 2015 ken 2021. Biktima ti umuna a masaker da Emerito Samarca, executive director ti Alternative Learning Center for Agricultural and Livelihood Development (Alcadev); Dionel Campos, pangulo ti lokal nga organisasyon dagiti mannalon a Mapasu ken ti myembro da a ni Datu Juvello Sinzo. Gapu iti masaker, napilitan idi nga agbakwit ti 3,000 a Lumad. Dua a mannalon a Lumad ken maysa a 12-tawen nga estudyante ti biktima ti maikadwa a masaker.

Kadagiti sumaruno a tawen, mano a daras pay a napilitan nga agbakwit dagiti residente gapu iti awan-sarday a pammapatay ken militarisasyon. Iti mandar ti rehimen Duterte, pinutirya ti militar dagiti pagadalan a Lumad a patpatarayen dagiti lokal a komunidad. Idi agangay, napilitan nga agserra dagitoy nga eskwelaan ken agingga ita ket saan pay a balbaliw a naluktan.